話說有次開會，某同事談到馬王「靚蝦王」落難屯門騎術學校：「我朋友去學騎術先知道『靚蝦王』喺香港榮休退役，但有乜理由將一代馬王放喺香港騎術學校養老㗎？」我唔賭馬，但八卦，即上網Check，原來真有其事，再睇其他網上討論區，更發現有網友狂插「靚蝦王」前馬主唔理隻馬仔，仲話住得屯門嘅退役名馬無隻好下場，究竟蝦仔係咪真係咁慘？
記者：羅灝汶
攝影：何家亮、林栢鈞
模特兒：Phyllis&Jason
幫前馬主贏3,770萬
「靚蝦王」有幾巴閉？出賽26次奪得12冠10亞驕人成績，幫馬主贏獎金高達3,770萬，2001年10月勝出國慶盃，以1分21秒3打破沙田馬場1,400米紀錄，賽後無馬迷估到國慶盃係「靚蝦王」告別戰，因為「靚蝦王」筋腱受傷要施手術，此後再無上陣，同另一匹馬王「原居民」齊齊入住屯門公眾騎術學校。
我拉隊入屯門探馬仔，「靚蝦王」精神相當唔錯，仲好有靈性咁同我哋打招呼，之後仲出沙圈散步，其實環境都唔係網友所講咁差，不過「靚蝦王」體形龐大，馬房間隔又細，相比其他退役馬王退役後可以去外國放牧，諗落又真係幾慘。
（網址： http://www.hongkongjockeyclub.com/chinese/
special/2003_fairy_king_prawn/king03_index.htm）
馬迷網上聲討前馬主
上討論區，發現到𠵱家都仲有馬迷討論「靚蝦王」去向，先有網友點題抨擊唔應該將「靚蝦王」留喺香港，其他網友亦相繼加入聲討前馬主劉錫康行列，內容大致話阿劉生孤寒，唔肯使錢將「靚蝦王」運去外國養老。
問番騎術學校，原來3年前劉錫康已經將「靚蝦王」飼養權全權交給香港賽馬會，換句話說「靚蝦王」已經係香港賽馬會財產，劉錫康已毋須支付任何飼養費。不願上鏡的某騎術學校學員報料：「3年前劉錫康喺某個公開場合，話佢同佢家人都視『靚蝦王』係家庭成員之一，送佢入屯門安享晚年，係方便自己隨時探望，等馬迷可以同佢見面，不過據我所知，佢嚟過2次咁大把咋。」
馬迷如何聲討前馬主，可瀏覽 http://www4.discuss.com.hk/viewthread.php?tid=1417366&extra=page%3D1
入屯門無好下場？
討論區上有馬迷問咗個得意問題：「大家可以諗諗點解『翠河』、『活力先生』等無咁易死，留在港的『同德』同『原居民』就十歲香，屯門騎校是否馬王退休安身之所呢？」
咁問有原因，因為贏取獎金超過4,500萬的「原居民」退役後同樣入住屯門公眾騎術學校，但喺2004年8月某天早晨倒地不起，學校職員不得已對牠實施安樂死。住1年就Die？咁「靚蝦王」咪……𠵱家住咗3年仲生勾勾，希望佢肥肥白白過埋下半世喇。（網址： http://www.voy.com/14114/2/12916.html）
馬比馬差天共地
1.無啖好食？
「奔騰」累積獎金2,920萬元，退役後馬主榮智健將佢運去其英國倫敦私人馬場，與「天演」、「活力先生」同「崑崙」3匹冠軍級名馬一齊歎世界。榮智健算係咁嘞，一得閒就會抽時間探望「奔騰」，餵佢食至Like嘅薄荷糖，間唔中仲會騎吓馬仔培養感情。「靚蝦王」呢？散步嗰陣見有靚草就即刻低頭猛食，唔通喺屯門無啖好食？劉錫康只係探過佢2次咁大把。
2.住窄屋
「翠河」累積獎金1,950多萬元，退役後馬主夏佳理將佢送去澳洲墨爾本嘅CarbineThoroughbredStudFarm頤養天年，牧場面積廣闊，「翠河」可以自由自在散步，生活極之寫意。夏佳理每逢到澳洲公幹或度假，都會抽空去牧場探望愛駒，可惜2005年「翠河」突然去世，令馬主與一眾馬迷非常傷心。「靚蝦王」呢？一代馬王都無特別優待，一樣迫迫夾夾咁住喺大馬房，同其他退役馬一齊生活。
馬評人撐！
馬迷有撐有唔撐！
「靚蝦王」精品少
或者香港人真係太現實，幫到馬迷贏錢咪係好馬囉，買精品把鬼咩？睇番香港賽馬會都無幫「靚蝦王」出過精品，「優駿會」店樊先生話：「有馬迷問過有無『靚蝦王』精品，有，得1隻日本安田紀念盃『靚蝦王』紀念公仔咁大把囉，仲要係日本賽馬會出嘅，香港賽馬會無出過！其他水晶相架都係馬迷自己拎相嚟訂做㗎咋。」呢隻紀念公仔eBay都有得拍賣，可惜叫價$280都無乜Noise，比起「精英大師」嘅精品相差好遠，都話香港馬迷好善忘，梗係喇，「精英大師」仲跑緊，仲可以幫馬迷贏錢嘛。
優駿會（65788733）
地址：旺角好景商場２樓59號舖
