馬會主席夏佳理落莊在即，回顧四年主席生涯，佢帶領馬會進行唔少重大改革，包括賭波合法化、改革博彩稅制等，佢接受商台訪問時透露，同港府談判博彩稅一度擱置，因為官員認為馬會投注額下跌只係周期性問題，但事實證明呢個係結構性問題，官員為保住博彩稅收入，最終都同意改革。
十幾歲就開始睇馬嘅夏佳理，第一次落注買馬係十幾歲喺英國讀書時，贏錢就可以鋸扒，而佢印象最深刻嘅贏錢經歷係買六十蚊三重彩，贏咗十二萬幾，佢話當日落雨大爛地，佢買嘅超冷門通通贏晒，刀仔鋸大樹贏到開巷。
作為馬會主席，夏佳理提醒馬迷小賭怡情，「始終馬都係動物，好多變數。」佢嘅獨門貼士則係專吼冷門，「十隻大熱門平均贏兩、三隻，賠率得兩、三倍，冷門賠率好啲，計落贏到錢機會大啲。」
夏佳理係馬王「翠河」馬主，唔少馬迷仍記得翠河風采，「隻馬有啲天才」，佢話唔望馬迷記得佢呢個馬會主席，「記住翠河就得嘞。」
傳真︰2623-9278
電郵︰[email protected]