諾記迷餓機近4個月，喺日前N3250終於推出，個價仲定到鬼咁低，簡直打到水機落花流水；另一邊廂，早前靜靜雞見街嘅黑色版N70，氣勢都唔弱，無論行水，甚至連舊嗰隻銀色版同告缺貨，Sales大歎話，如果喺「5．1」黃金周仲係咁就慘！
機場Sales表示，N70一直幾受港客同自由行客歡迎，部份經常到香港做生意嘅客人仲話，嫌大陸版N70冇3G鏡頭，所以專程嚟香港買㖭！但到咗最近，傳聞由於貨源唔夠，Sales話已經剩番3、4部撐住個場，賣晒就冇得入貨住；不過，佢又補充，即使N70缺貨都好，行售價依舊定喺$3,400左右，而水貨就大約$3,100，個價炒唔起。
記者：尹謹基
「博彩王」增即場投注
歐聯賽唔覺唔覺又踢到4強，筆者上星期約咗朋友落Bar傾偈，順便睇當晚賽事；點知，見佢好緊張猛㩒部手機，再睇清楚啲，原來玩緊即場投注，筆者雖然唔識得賭波，不過見佢玩到手心都出晒汗，就知幾緊張啦！
講開即場投注，佢其實係SmarTone-Vodafone新開設嘅玩法，只要登記咗「博彩王」手機網上投注，唔使更換SIM卡，就可以隨時玩得。即場投注項目包括主客和、讓球主客和以及估波膽，喺比賽中途，只要見到畫面上有個「即」字，就表示能夠即場落注，唔單止考驗到你嘅眼光，仲鬼咁刺激㖭！阿叔都話啦，波係圓嘅，賽果隨時會改寫，自問心血少啲，就諗清楚先好試喇！
查詢：SmarTone-Vodafone（28802688）
