偈，復活節玩得開心嘛？
謝太：幾好吖，湊吓個孫去海洋公園玩囉，仲玩埋過山車㖭。我第一次玩，好刺激呀，不過玩完之後有少少腳步浮浮，highhigh哋。
Karen：（笑着說）係呀謝太，雙腳飄飄然，好似做神仙咁，真係好high㗎。好在你鍾意玩過山車喳，上個禮拜個市郁得好勁，差唔多升到萬七。你揸緊嗰3隻股：中海油（883）、江銅（358）、地鐵（066），其中江銅就就真係好似過山車咁嘞。
謝太：（笑着回答）唔怪得江銅股價大上大落啦，你自己都話間公司除咗銅，仲出產好多金同銀，所以應該改名為「江西金銀銅」。上個禮拜金銀銅價都大上大落，特別係銀，唔好話去海洋公園玩過山車，睇銀價星期四落完，星期五又上，就直頭好似跌咗落去海洋公園新開嘅水母館裏面，諗住死梗嘅時候，就出現個靚仔救生員救番，佢仲口對口做人工呼吸㖭（雙方大笑）。死啦Karen，呢個電話有冇錄音㗎？
Karen：有呀謝太（雙方再大笑）！不過，我計過就算再唔升，金銀銅價維持喺呢個水平，江銅都會賺到遠超過分析員預期嘅利潤。所以我都係建議你等到原先11蚊嘅目標價。我只係驚今個禮拜，金銀銅淡友會再做淡啫。
謝太：冇錯，不過金銀銅升係大勢所趨，上個禮拜江銅收$8.65（見圖），等到11蚊應該冇問題，我有心理準備江銅會好似過山車咁㗎啦。咁中海油同地鐵呢？
Karen：講中海油先啦，上次我同你講話啲分析員會唱淡，咁中海油真係跌穿6蚊，不過識貨嘅知道油價唔會跌，都會慢慢咁入市。𠵱家中海油又差唔多升番去歷史高位，由上次高位到今日，要賣嘅都差唔多賣晒，只要中海油升穿歷史高位到7蚊，就會好快去到我嘅目標價$9.2。
地鐵到價先套現
至於地鐵，呢隻就麻煩啲，雖然我都信恒指會靠地產股接棒繼續升，而因為勾地難，地鐵嘅住宅發展就變成獨市地產生意。不過，我諗全世界都已經明白呢點，所以股價暫時已經全面反映，都係放咗佢，揸番啲現金先。
謝太：OK，咁幫我放地鐵啦。仲有冇其他股好買？
Karen：我諗睇吓中海油升唔升穿7蚊，如果得，我哋就追啦。
謝太：咁幫我睇實，升穿7蚊你就打電話畀我。
Karen：收到，多謝謝太！