同吳天海（圖）共事過嘅人，都話佢老哥係工作狂，可以朝七晚七咁做。收咗工食完飯，如果同事話得閒，佢會話：「咁不如一齊返公司繼續……」當然佢咁勤力自然有回報。
總商會《工商月刊》最近訪問佢，講對於𠵱家香港最需要乜嘢，佢話覺得目前最迫切嘅問題係，港人鬥志減弱，其次環境質素每下愈況，最後就係政府對市場嘅不必要干預。
喺九倉做咗咁多年，佢自然覺得公司好啦，仲話最欣賞嘅商人就係已故主席包玉剛。做咗咁多年，佢話公司抱負就係自己嘅抱負，個人抱負就冇乜，或者退休後可以學吓彈琴喎。
今年世界盃有線獨家直播，吳天海少不免都要講兩句，佢話英格蘭自從四十年前（1966年）奪標後，一直與冠軍無緣，希望佢哋今年有機會重登寶座。