生意遍布全球五十四個國家嘅和黃，要喺年報講晒集團嘅嘢都幾難。不過，佢哋剛剛發表嘅05年度年報就用咗一個好簡單嘅方式表達，封面構圖用英文字砌出一棵樹嘅「年輪」（圖右），樹幹主體自然係集團和黃，向外擴展出五大核心業務，並有齊各項業務旗下嘅「生意」，唔睇真啲都唔明。
至於姊妹公司TOM集團本年報（圖左）一樣大玩文字。佢哋講，因為文字係最簡單、直接同清晰的溝通方式，色彩豐富就代表集團業務多元性，亦講出業務特點：「互動接觸」梗係話互聯網、「創意無限」指出版、「力量非凡」嘅係戶外媒體、「活力澎湃」代表體育、電視及娛樂就「領導潮流」喎。不過華華就覺得，如果將TOM仔本年報放喺報攤，會唔會有人走嚟買──以為又有一本新潮流雜誌面世。