和黃（013）耐唔中大大嚿賣嘢，賣親都係特殊利潤大過賬面成本多多聲。今次賣港口業務，賣價340億元，盈利佔244億元。唔怪得上周五和黃先行異動。
和黃有ADR掛牌，1ADR等於5股，但一向交投小貓三兩。上周五，成14.5萬ADR，折合72.5萬股，比前市多17倍，高收51美元，折合79.10港元。（上周五本港收75.25元）。今朝本港開市，和黃有戲睇，C輪出現搶貨潮。如果和黃升得少，買C輪無妨，升得多，算數，恐怕水位唔夠。
恒指C輪4517：恒指上周五跌32點，近排累積升幅唔細，有啲調整唔奇。調整過後，又嚟過，市場始終錢多。市場冇錢，神仙都冇法子谷起個市。市場錢多，萬事好辦。
個市調整之時，趁低買恒指C輪。4517係理想對象，隻輪7月28日到期，輪價28仙，溢價1.8%，槓桿率16.6倍（有效11.2倍），引伸波幅18.9%。
中芯C輪9677：中芯（981）喺1.20元上下浮沉咗近4個月，業務未見起色，去年蝕1.12億美元，今年有啲機會恢復盈利，但PE都仲係高到好幾十倍。不過咁，大落後之後，又跌唔落，偶然亦會彈彈吓，趁低買啲C輪博吓，對象係9677。隻輪11月初夠鐘，輪價9.8仙，溢價8.3%，槓桿率12倍（有效6.9倍），引伸波幅25.1%。各輪中，9677數據最靚。
章盛