雖然相對於《Warcraft》、《AOE》或者《C&C》，《RiseofNations》呢個系列喺名氣上稍有不及，不過點都算係有番咁上下江湖地位嘅勁嘢，不乏忠心支持者。開發班底BigHugeGames做咗好耐嘅全新一集《RiseofLegends》即將面世，今次點睇都同前作有明顯分別，佢強調夾喺外星神族同巨人族之間嘅無助人類點樣求存，鍾意誇張打鬥嘅朋友千祈咪走雞。
文：陳福榮
《RiseofNations》係由著名RTS《Civilization2》嘅原作者BrianReynolds，幾年前自組新公司開發，贏得唔少美金同掌聲！出多隻資料碟後就埋頭苦幹整《RiseofLegends》，因此佢並唔算係《RON2》。
相比起《RON》玩盡地球歷年來有特色嘅種族，《ROL》就好似《StarCraft》咁，由3個性能差別頗大嘅勢力所構成，縱使開局嗰陣用法上有分別，每種兵都有格食格嘅情況，不過當玩到大家企得住腳後，就出現超級部隊互毆情況。對於玩厭咗士兵大炮開片嘅玩家，《ROL》喺兵種方面算好有吸引力。
三大種族打崩頭
喺呢片名為Aio嘅土地上，長年累月都係由外星神族、中立人類同巨人族呢3個種族互相牽制，佢哋打仗唔單止用刀刀叉叉，仲會召喚奇形怪狀強悍生物、操作火力強大嘅機械人同戰機，甚至施放爆到七彩嘅超勁魔法！
為免花費大量時間喺SetUp度，遊戲系統設定得相當簡易，基本上稍為熟習嘅話，幾分鐘之內就可放兵攻到敵方陣營偷襲，玩起上嚟爽快好多。
令人讚歎係大型部隊做得好誇，飛龍同機械人等做得好靚，成個畫面都係超勁部隊，打起嚟特別壯觀！
光源效果耍家
唔係講笑，可能係佢有重視科技同魔法嘅兩大陣營啦，《ROL》特別強調畫面對爆炸效果嘅處理，例如啲巨大機械人同戰車開片，火花四濺嘅場面真係好正，比起平時啲RTS超好多班；至於整到周圍都係光柱嘅魔法就更加唔使講。另外佢嘅角色構造都幾細緻吓，機械人啲關節會逐忽郁，戰機唔係齋停喺空中而會四圍走，飛龍拍翼仲似模似樣㖭，咪講玩嗰個緊張就算睇人玩都幾過癮。至於場景方面，基本上諗得到嘅地點佢都有齊咁滯，森林、沙漠、城池、古文明遺迹以至雪地都有，每種都有特色，誠意絕對可嘉。
PROFILE
遊戲類型：RTS
對應機種：Windows
遊玩人數：1至8人
發售日：5月23日
