有成73年歷史嘅永隆銀行(096)喺上個禮拜六開股東會,華華都有去湊熱鬧。其實永隆都算唔話得,唔似其他上市公司咁喺平日搞股東會,搞到啲要番工嘅股東嚟唔到。佢哋喺禮拜六上晝搞,等啲股東嚟當飲早茶,真係周到!
華華見過有啲公司因為唔夠嘢食,啲股東又搶又推又撞,仲整親人㖭。有啲仲係大藍籌,真係失禮死人。不過,永隆為咗唔想啲股東要爭嘢食咁辛苦,好似啲藍籌公司咁,所以將啲食物包好一份份,連埋飲品一袋袋派畀股東(圖),方便安全。
其實啲點心又有幾貴呢?嗰啲孤寒嘅大藍籌,派息又少過以前一大截,啲高層就照出咁多人工,畀番多少招呼同安撫吓啲同甘共苦嘅小股東,又用得佢哋幾多錢?