夏天漸近，是時候回歸這個同陽光與海灘成等號的香港後花園──西貢，吹吹海風Relax心情之餘，當然要來西貢搵好嘢食。但不知從何時開始，亦不知是否飲食雜誌影響力太大，香港人愈食愈嘴刁，唔新唔願食，雖然西貢經常有新餐廳，但其實有很多打躉多年的食肆仍有不少捧場客，今日介紹的，有冇一間你覺得熟口熟面，經過，但……你有眼不識泰山？
記者︰方綺君 攝影︰陳偉強
Model︰Kenny、Ruby@Salvador
西貢有咁多海鮮酒家原來有段古。早在14世紀來自華南的水上人便將漁船停泊在西貢，後來逐漸在海邊建立多條小漁村，並將魚穫運到市場（即趁墟），早上6點至10點魚販會把貨物放在大竹籃裏，高聲吶喊吸引顧客，熱鬧非常，他們都用上有二千年歷史的手秤來量重，今天還有少數魚販使用呢！
親切老闆娘 傾足15年
開業已經15年的滿泰，當年老闆何生何太因為有相熟的泰國親戚，就想到開泰國餐廳，無心插柳之下，到今時今日由一個舖位做到四個，直到現在，何生何太仍會落手落腳到舖頭幫手。民福路食肆成行成市，滿泰任何時候都有客仔，大多以熟客居多，入到舖由叫嘢食到埋單，老闆娘同顧客都有傾有講，就好似返屋企食飯咁casual，加上老闆娘親切好傾，好有街坊feel。
鹹豬肉雞飯$32
飯底用雞湯和雞油煲，再撈入炸蒜食落有卜卜脆和蒜香。豬腩肉和雞醃過夜入味，隔水蒸再炸，肉質軟腍腍，腩肉肥瘦適中入口即溶，一日可以賣百幾碟，勁！
串燒雞豬牛$35/半打
泰國菜點少得串燒！滿泰的串燒首先用椰粉椰糖等醃料處理，所以味道會有少少甜，在烤爐上烤20分鐘，外層香噴噴的燒烤味，點埋秘製沙嗲汁，令人食指大動。
椒鹽軟殼蟹$98
泰國空運到港嘅軟殼蟹洗淨再炸，當然唔係咁簡單，主角椒鹽加埋炸蒜和麵包糠，卜卜脆夠晒香口，送啤酒和梳打水最好。
滿泰小食店（27912271）
地址︰西貢福民路高勝樓地下25號舖
營業時間︰8:00am-10:00pm
大件抵食 歐陸閒情
來到西貢，節奏已經慢半拍，走進UncleKanCafe感覺更強，置身於歐陸風情的環境下，十多呎的樓底，耳邊的貝多芬音樂，身軀和靈魂都可以完全放鬆，享受一個悠閒的下午茶。開業5年，餐廳以服務和食品質素見稱，人人都知呢度嘅茶餐大件抵食，老闆Kan︰「呢度嘅蛋糕全部係自家製，好多客都因為蛋糕再返嚟。」午市和晚市亦有不少選擇，如喇沙湯底麵、葡菜和西餐，全年都有得食嘅芝士火鍋更是無人不識。
雙式芝士焗蒜茸法包伴吞拿魚醬 $30（配咖啡或茶）
麵包焗好軟硬度適中，包邊香脆，中間的芝士蒜茸料勁多，最有驚喜係個吞拿魚醬，唔腥又唔會太鹹。
芝士火鍋$218/2位用
可選原味忌廉芝士濃汁或蒜香紅酒芝士濃汁鍋底，均用幾種芝士秘製而成，芝味濃郁。火鍋配料包括麵包籃、海鮮雜錦大燴伴天使幼麵、鮮肉拼盤和甜品焗脆香蕉吉士班戟伴朱古力汁等。
UncleKanCafe（27917322）
地址︰西貢萬年街13號地下
營業時間︰12:00nn-10:00pm（星期日至四）12:00nn-10:30pm（星期五、六）
街坊推介 鹽水雞腳
我愛西貢露天cafe夠情調，更愛茶餐廳夠地道。食物價錢唔算平，但仍有唔少街坊擁躉和街客支持，尤其係當中的鹽水雞腳，西貢街坊無人不知。和記由89年一間小小的茶餐廳到95年擴充至隔壁舖位，成為西貢最大的茶餐廳。和記客源大多數是遊客，有很多人會在假日出海釣魚，雖然門面上無說明，但和記可幫客人將魚穫加工。老闆馬生由細到大住響西貢，當日佢參觀完在糧船灣的天后誕，仲話晏啲要去跑步︰「我每日都要抽時間做吓運動！」認真識歎，莫非呢啲就係西貢人過嘅悠閒生活？
鹽水雞腳$30/10隻$15/5隻
食雞腳不外乎吮陣鹽水味，呢度嘅鹽水雞腳就做到剛剛好，又唔會煮到啲雞腳骨肉分離，閒閒哋一個人都可以掃一碟。
西貢和記餐廳（27920636）
地址︰西貢海傍廣場2號9至10號地下
營業時間︰7:00am-10:30pm
精選名店
高檔之選
賣點係高級西餐，有名廚Welly坐鎮，30歲年紀輕輕的他，24歲已是蘭桂坊集團的主廚，後來成為飲食連鎖店DoubleStar的總廚。自立門戶開設的小城大廚，除了拿手的西餐，還有自家設計的Fusion菜，不時令客人有新驚喜，用料亦唔貴唔用，但餐牌上的菜式只是40多元至百多元。
小城大廚（27920322）
地址︰西貢普通道54號地下
營業時間：11:30am-10:30pm
地踎之選
咪以為地踎就係揦揸，由外面睇呢度光猛又整齊，絕對唔似賣車仔麵，威水史係連續5屆（2年一屆）奪得衞生清潔食肆獎。最出名莫過於豬手同牛腩，牛腩肉質腍，豬手份量多有南乳味，有超過40款的車仔麵配料任你揀。
西貢松記車仔麵（27929172）
地址︰西貢福民路高勝樓18-21號地下
營業時間︰7:30am-8:00pm
