煲呔原來除咗鍾意養錦鯉，原來仲有鋪睇雀癮！佢噚日喺港台《香港家書》，由禽流感講到環保，自爆當年做貿易署署長時，已經培養觀鳥嗜好，佢話當年住喺賓吉道政府宿舍，成日睇住啲雀仔飛來飛去，就勾起佢對大自然嘅好奇心，咁就上咗鋪睇雀癮！
煲呔又話自己性急，睇雀可以平衡心態，因為如果要親近大自然，就要跟大自然規律辦事，無論你權力幾大，都唔可以叫啲雀飛出嚟俾你睇，又可以學吓點樣克制、忍耐，話呢啲係做領導人嘅必須條件。不過最令八方要向煲呔學習嘅係，睇雀都要睇吓同邊個睇，好似當年煲呔就識得搵前銓敘司（相等於𠵱家嘅公務員事務局局長）羅能士做睇雀啟蒙老師，能與如此猛料高人一同睇雀，自然睇得份外入神啦！
爆料熱線：29290000、27860099
報料傳真：26239278
報料電郵：[email protected]