春風化雨三十六年嘅關信基，今年就會退休，佢噚日喺中大教埋最後一課，好多畢咗業嘅校友都特登返嚟捧場，坐滿晒成個大課室。呢堂嘅題目係「政治發展的釋義，對香港的思索」，關教授由香港六、七十年代講到𠵱家，講到最後唔知係唔捨得學生，定係對香港前途憂心，佢講到有啲哽咽，差啲想喊埋出嚟。
關教授話，香港嘅歷史就係「一部由掙扎求存過渡到追求自主」嘅歷史，香港從來係充滿矛盾，過去咁多年，香港有獨特嘅維新思想，咁多年一直貢獻祖國，如果唔係有香港發展模式嘅參考，內地早期改革開放就唔會咁成功，香港嘅法治、交通、規劃、土地政策、市場管理都係中國現代化嘅參考，內地好多人都好希望香港繼續咁獨特。
希望香港寫首好歌
講到最後，關教授引述胡錦濤喺美國嘅講話：「多樣性好重要，正如一個音符係唔可以奏一首歌」，佢聽完之後都好感觸，希望香港呢個咁多樣性嘅音符，可以為中國寫番首好歌，發揮應有嘅貢獻。講到呢句，關教授就有啲眼濕濕，仲差啲落淚。
之後台下啲校友、學生個個爭住問問題，有啲話好欣賞關教授拋頭顱出嚟搞政黨；有啲就關心公民黨係咪可以同中央溝通；有啲就希望關教授鼓勵多啲學者參政；有啲人仲搞鬼到問佢點樣解決伊斯蘭文化嘅唔知乜嘢衝突。
同中央溝通感樂觀
關教授好有耐性答問題，佢講笑話，自己最叻係理論，但叫佢研究政策，解決福利主義同資本主義嘅矛盾就好難喇。佢又話，以前都冇咁感性，可能係信天主嘅影響，因為老咗先發覺理性係解決唔到人同人之間嘅問題，總之大家唔使擔心公民黨同中央冇偈傾，呢位創黨主席好有信心係可以溝通嘅！
爆料熱線：29290000、27860099
報料傳真：26239278
報料電郵：[email protected]