每年四月都係商貿展覽旺季，以前得一個會展做晒，但自從機場個亞洲博覽館開咗之後，正所謂「多隻香爐多隻鬼」，多咗好多火花，好似呢兩個星期咁，本地薑貿發局（TDC），同埋喺上海殺落嚟嘅GlobalSources，分別喺兩個場搞同類展覽，話就話各有各做，但爭風呷醋情況真係好難避免。
雖則大家表面客氣，查實暗地發功。好似一向只係公布展商數目嘅TDC，今勻就自動波透露埋展位數量有四千三百個，暗寸博覽館去到盡都係四千個位；GS就話自己着重客人需要，唔會收五星級價錢，兩星級服務，又話都未用到個停車場。
TDC喺家品展開幕禮時，又預咗大袋紀念品畀傳媒，又同鏞記、麥奀記合作，送燒鵝、雲吞麵畀買家；而GS就趁對手開幕，到灣仔踩場請記者食飯，又送機鐵飛同埋一百蚊展場餐飲券，仲揶揄有人「鵝髀打人牙骱軟」。
對於俾人踩到上心口，TDC總裁周啟良就話唔會評論，話就話唔講，但都拋低一句「喺香港搞展會，又以內地公司為目標客群，規模大極都唔及廣交會。」笑GS有過半客仔，都係來自國內！
爆料熱線：29290000、27860099
報料傳真：26239278
報料電郵：[email protected]