鄭少秋和前妻沈殿霞的女兒鄭欣宜，對娛樂圈充滿憧憬，縱橫娛樂圈三十多年的秋官，深明攀得愈高跌得愈痛的道理，雖然他不反對欣宜入行，但一定要她先完成大學課程，還要希望她能明白當藝人並不能光發明星夢，要努力不懈去演出才行，更要懂得面對種種挫折。 撰文：比華利
補償父愛 陪欣宜傾偈
鄭少秋為人風趣幽默，與他談起女人，即有滔滔不絕的話題。他與前妻沈殿霞所生的囡囡鄭欣宜，因見面和溝通機會不多，所以秋官會盡量給欣宜補償父愛，他說：「我曾應承個女每星期無論點忙，都會抽時間同佢傾電話。不過佢入咗大學之後，好似好忙。」
欣宜熱愛幕前演出，秋官表示不介意她加入娛樂圈，但首先要她完成學業，和明白到人生要面對挫折，秋官說：「我擔心佢乜嘢都太順利，以為得心應手而驕傲起嚟。欣宜好有才藝天份，好啱做呢行，記得佢細細個嗰時就唱卡通片《風中奇緣》嘅歌畀我聽，我都冇唱到咁順。我最希望欣宜清楚知道做藝人唔同發明星夢，入得行要好努力演出，呢行愈去追求榮譽同成就，挫敗嘅機會亦愈大。」
自讚唇薄 識講嘢𠱁人
當秋官提到現任妻子官晶華，即大讚道：「好感激佢一直喺我身後默默支持，佢都捱到瘦晒。」曾聽秋官提過官晶華按摩技巧一流，他說：「佢手勢幾好，不過近年手指痛，我唔好意思成日叫佢服侍我。」秋官續說：「老婆係鄭家嘅Queen（皇后），亦係我心目中嘅No.1，我乜嘢都遷就佢。」
兩公婆遇到爭拗又怎樣解決呢？秋官說：「冇嗌交就呃你，有時我發現語氣重咗會即刻收口，自己做錯咗必定會講sorry，又或者錫番佢。」秋官邊說邊指着自己的薄唇，並得戚的說：「唇薄好識𠱁人，我又真係幾識講嘢嘅！」
至於他的老拍檔汪明荃，秋官最欣賞她對演藝工作的熱忱，他說：「佢對工作實事求是，精益求精，呢個係佢成功之道。」
長線投資 驚一鋪清袋
秋官九二年拍攝無綫電視劇《大時代》，扮演丁蟹一角，劇集播映時股市大跌，從此每逢有秋官主演的劇集，播映期間股市都會下滑，有人以丁蟹效應來解釋這種現象，不過本月初播映新劇《潮爆大狀》時，股市勁升，難怪秋官得戚的說：「呢鋪我威番次，真係多謝傳媒造就。」
秋官續說：「次次我有劇上，股票回落都話關丁蟹效應事，我根本唔當係一回事，我唔迷信。」原來秋官都有投資，但主攻長線兼風險較細的藍籌，他說：「我唔敢買風險大嘅股票，我驚一鋪清袋，我有家庭有子女，點都要保險啲。」相士曾勸秋官只可投資房地產，他解釋就算樓價跌亦不擔心，他說：「到時我間屋仲可以自住，供樓咪當交租！」秋官之前賣掉渣甸山的豪宅蝕過百萬，他不諱言確實有點肉痛，但搬進了禮頓山，一家人住得舒舒服服就值得了。
選明日之星
古仔愈嚟愈好
我同古仔喺無綫劇集《天地男兒》中扮演叔姪，當年已經覺得古仔有我影子，佢好靚仔，但當時未開竅，太保護自己，佢可能擔心自己嘅過去會影響形象，不過邊有人冇過去呢？我相信佢第日必定有更大嘅發揮，估唔到古仔跳去電影圈發展，愈嚟愈好，我之前睇咗佢喺電影《黑社會》裏面扮Jimmy仔，佢演技揮灑自如，我睇好佢將來會喺演藝界有更大嘅成就。
葉璇欠觀眾緣
葉璇喺《非常外父》度做我嘅乖乖女，佢演戲時好用功，對每樣嘢都好有見地，係一個聰明女，好知自己做緊乜嘢。不過我始終覺得佢仲係爭咗少少觀眾緣，當有一個角色或者一部劇集，可以幫佢打通呢個血脈，佢嘅星運肯定更上一層樓。我當年都係憑劇集《書劍恩仇錄》嘅大俠角色，得到觀眾認同。不過呢點好矛盾，始終做演員又切忌定型，咁樣好難跳出自己個框框。
唐寧必成大器
𠵱家播緊嘅新劇《潮爆大狀》，我同唐寧扮演一對律師父女。唐寧嘅外形非常討好，我同佢合作過，發覺佢嘅演技穩陣流暢，不過只係爭咗少少運氣，唐寧嘅情況，就好似喺佢面前有一扇門擋住，但道門就等緊有一日佢自己打開。我認為佢第日有機會喺一套劇集擔正嘅話，就代表佢嘅機會嚟㗎啦，我深信唐寧將來都會成演大器。
攝影：陳志嵐 場地提供：Gossip17
