《成報》員工醞釀罷工嘅風暴愈吹愈烈，風暴中率先犧牲嘅係社長包雲龍、副社長兼總編輯郭一鳴，兩位一齊請辭。八方打電話問候郭一鳴，佢就一邊苦笑，一邊慨歎喺《成報》兩年嘅工作生涯壓力太大，大到佢承受唔到，無能為力。
今個月尾就係《成報》生死存亡之秋，員工已經被拖欠兩個月至兩個半月工資，員工已經向公司管理層發出最後通牒，若然月尾仲未有糧出，就會採取工業行動。郭一鳴話，免費報紙同報章減價係《成報》嘅致命傷，不過有員工就認為，呢啲不過係外傷，《成報》最致命嘅內傷係管理層經營不善。管理層早前向員工發咗張個半月糧嘅期票，大家觀望緊可唔可以兌現，唔係就五月一日罷工去也！
爆料熱線：29290000、27860099
報料傳真：26239278
報料電郵：[email protected]