由05年10月21日至本月21日，短短半年，中國稀土（769）由0.65元升至1.95元。嘩，升幅200%。
中稀業務係產銷各類金字部首嘅金屬，用於生產高科技產品，又產銷30種耐火產品，主要用於鋼鐵、建材、有色冶金等工業用嘅窰爐。半年前股價未升之前，PE只係5倍以下。低PE股票一旦俾人掘出，爆發力出晒嚟，中稀股價就輕易飛上去。
今周推介，唔係中稀，而係亞洲鋯業（395）。亞鋯業務與中稀相似，產品涉及防火耐火性質，太空穿梭機都要用呢味嘢。
亞鋯炒得過，歸納理由如下。用唔同數據分析，可以得出唔同嘅目標價，通通都高過現價好多。
中稀半年升200%
第一、過去半年，中稀升200%，亞鋯只由0.70元升到0.95元，升幅只有36%。亞鋯如果同步，應見2.20元。
第二、往績計，亞鋯PE8倍，中稀14.8倍。亞鋯PE如果同中稀一樣，應見1.76元。
第三、亞鋯P/B0.97倍，中稀1.97倍。同樣P/B計，亞鋯應見2.03元。
第四、亞鋯現價較歷史高位1.93元（扣除股息）回落53%，中稀較歷史高位3.025元回落35%。同等跌幅計，亞鋯應見1.25元。
第五、亞鋯前景無可限量。佔營業額86%嘅化學產品中，熱電能源產品係核發電設備供應鏈其中主要一環，中國計劃到2020年核能發電能力擴大5倍，增建超過20座核發電廠。呢筆大生意，只有穩站中國同業以至亞洲同業No.1嘅亞鋯可以手到拿來。
第六、去年開發嘅電池業務，開辦初期蝕本，但已成功開發加鋯鎳氫電池，可在高溫下使用，新產品已獲國家檢定通過，又取得歐美市場所需CE及UL認證，預料定單滾滾來，成為盈利增長動力之一。中國搞3G如箭在弦，電池業務又堪憧憬，可以講係又有3G概念。
第七、全球對鋯化學品需求不斷增加，除手機鋰電池需用鋯之外，涉及民生所需嘅陶瓷、化妝品、人造寶石等等行業，都需要呢種高度耐熱抗蝕金屬元素（熔點高過攝氏1850度），亞鋯唔憂冇生意做，盈利唔憂冇增長。
街貨唔夠億八
亞鋯好易畀基金睇中，一旦基金落行，將有類似中稀嘅翻版走勢。亞鋯市值得4.79億元（中稀已升至23.09億元），大老闆楊新民持有63.20%，街貨只有1.76億元。每個基金係咁意買5%只需2400萬元，幾個基金，已可將亞鋯捧到半天高，貨疏易搞。今年4月至今為止，不過11個交易日，成交量1.04億股，已經佔咗街貨（1.86億股）5成半，又較3月份（全月1333萬股）激增近7倍，更加係05年平均每月440萬股嘅24倍。基金手影已現，食指已動。
亞鋯往績PE8倍，預測降至6.8倍。目標PE睇13-14倍，目標價就係現價0.95元嘅1個double，睇1.90元。港股處大時代，PE13-14倍你話得唔得？
高彰坡