一份堅持、一份執着，好與壞真係觀點與角度嘅問題。堅持唔肯為家中狗隻絕育，令到愛犬雜交出10隻大狗，兩位主人所受嘅壓力不言而喻。令人感歎嘅係別人眼中你那份執着可能好無謂，正如阿媽教落：冇咁大個頭就唔好戴咁大頂帽！唔知當中主角Maggie又明唔明呢?!
記者：許維雅
攝影：陳偉強
一切由鹹濕開始
Maggie同Yon由當初兩隻狗變4隻，再由4隻變到𠵱家10隻，全因女主人Maggie的一份堅持－－－絕不為狗仔絕育！
他們起初只養了兩隻金毛尋回犬Pizza同Cookie，一心諗住兩隻小狗會為他們多生一兩隻金毛BB玩，點知阿男金毛Pizza唔生性，數年無所出，膝下猶虛。於是他們惟有養多兩隻雪橇犬Mocha同Pepsi，點知咁就出事喇！喺一個月黑風高嘅晚上，雪橇Mocha同金毛Cookie撻着咗，無耐之後仲生咗一竇雪橇溝金毛BB㖭！Maggie亦割愛送了一些狗BB給親朋好友，現在只剩下大Beer、細Beer同Nuts。不過鹹濕的雪橇Mocha喺一年後玩亂倫，搞大埋自己個女大Beer個肚，結果又生多竇。兩公婆就咁又要養多3隻溝上溝狗仔，埋單計數一家10犬從此迫在百幾呎的露台食宿。
男女主人意見不同
Maggie跟Yon兩口子屬小康之家，Maggie做銀行，阿Yon揸車搵食，但要養10隻大狗，無論身心同經濟負擔一點也不輕。眼見佢哋兩位充滿愛心，我禁不住問Maggie：「你會唔會幫啲狗仔絕育？」Maggie立刻回敬一個決絕的答覆：「唔！唔想！」一再追問之下，發覺其實Maggie的堅持並冇甚麼特別理由，亦唔係因為甚麼宗教信仰，純粹係一份執着。
不過當我有機會同男主人傾起時，阿Yon諗都唔諗就爽快回應：「我贊成絕育！不過Maggie唔想冇辦法。其實養10隻大狗實在好疲累好辛苦，我曾經有諗過放棄，畀人又好、送去愛護動物協會又好，我真係好攰！不過始終養咗咁耐，同佢哋隻隻都有感情，最終都係因為唔捨得而打消念頭。」呢一刻，我完全感受到阿Yon的無奈，希望唔會因為咁而影響他們的感情啦！
10狗10性格
要養10隻狗，Maggie擔當照顧牠們起居飲食的角色；至於阿Yon就覺得照顧牠們必須照顧埋牠們的心理，要同牠們玩就要隻隻玩齊，否則牠們會覺得你偏心。現在Maggie同Yon每日放三次狗，每次帶兩隻，輪流出街，有時去露營去沙灘玩都會帶一至兩隻。10隻狗中UnclePizza同爸爸Mocha會充當大男人角色，Pizza警覺性甚高主要負責看門口，Mocha有勇有謀主力監控其他9隻狗，更曾經為保護牠們而嚇退不少意圖侵襲嘅流浪狗㖭！
十犬家族史
第一代 Pizza（金毛尋回）
同呢個家族最冇關係，擔當Uncle看門口。
Cookie（金毛尋回）
第一竇媽咪，當正自己係人，惡到乜狗都咬勻。
Mocha（雪橇犬）
一家之主，十分有威嚴，隻隻狗都要聽佢話。
Pepsi（雪橇犬）
買返嚟養大後發覺有怪病，生得一個不尋常的大肚腩。
第二代（雪橇Mocha×金毛Cookie）
第三代（雪橇Mocha×囡囡大Beer）
免費攞寵物戲飛
以寵物為題材的電影一向係票房嘅靈丹妙藥，一些可愛嘅小動物配合生離死別嘅場面足以令不少女觀眾落淚。即將上畫的《再見！流浪犬》講述一個8歲小女孩的悲涼故事，相信必定有大把女觀眾捧場。
現在iPETchannel.com會員將有機會免費得到5月6日晚7:30pm於香港會議展覽中心舉行嘅《再見！流浪犬》優先場戲票。只要會員立即郵寄姓名、電話、會員編號、電郵地址及連同回郵信封到iPETchannel.com，就有機會免費索取2張戲票，名額50名，先到先得。
查詢：82032223
地址：觀塘鴻圖道76號聯運工業大廈11樓A室
