運輸署近日開始接受自訂車牌組合申請，一眾藝人已想好心目中的理想車牌，葉璇表示會用璇字的普通話拼音配生日日期，自訂「XUAN214」車牌，掛在其六十萬元平治SLK350跑車上。而陳豪欲以英文名Moses簡稱「M0」為自訂車牌。湯盈盈則希望以法文「B0NJ0UR」（中譯：你好）為車牌，十分有意思。 撰文：比華利
運輸署由本月起開始接受首輪自訂車牌組合申請，下月二日截止。葉璇、陳豪和湯盈盈等一眾藝人已想好心目中的理想車牌。葉璇去年簽約林建岳旗下的經理人公司進軍影壇，還斥資約六十萬元購買銀色平治SLK350跑車獎勵自己，並已想好了一個心水車牌，準備日內前往申請。
問葉璇自訂了甚麼心水車牌？她說：「我會揀『XUAN214』，XUAN係我個璇字嘅普通話拼音，平時影迷同朋友都鍾意叫我阿璇，而我身份證都係呢個拼音，比較特別，應該好少同人撞名。而214就係我嘅生日日期，兩組字加埋一齊就啱晒自訂車牌嘅要求。」
改變一生的日子
二月十四日對於葉璇來說，是一個幸運日子，除了是她的牛一外，又是浪漫的西方情人節，而且在九九年這一天，正值國際華裔小姐決賽，葉璇說：「嗰日我好幸運得到冠軍，於是我就有機會加入娛樂圈，改變咗我嘅一生。」所以214這個號碼對葉璇來說特別有紀念價值，最好用作自訂車牌。
對於運輸署接受市民自訂車牌，葉璇開心地說：「運輸署呢個安排好好，因為競投一個特別嘅車牌一啲都唔平。𠵱家可以自己設計同擁有，感覺好實在。」
葉璇入行七年，先後擁有兩部座駕，分別是之前價值約二十六萬元的綠色福士甲蟲車，及現在的銀色平治SLK350跑車，無獨有偶，兩部車都是舊愛為葉璇推介的車款。她說：「兩部車都係以前男友幫我揀，但兩部都唔係佢哋送，福士甲蟲車係爹哋買畀我嘅，部平治跑車就係因為賺到錢買嚟獎勵自己嘅。」
希望路上零意外
而陳豪則揀選M0做私伙車牌，他說：「我一直都好想擁有一個自己設計、獨一無二嘅車牌，如果自己設計，我會選用MO，但O字要用數字0取替，我個英文名係Moses，如果用晒全個英文名好累贅，況且我又鍾意單音，朋友都鍾意暱稱我阿Mo，所以揀呢個做車牌最能代表自己。」
湯盈盈則希望路上零意外，所以自訂法文B0NJ0UR（中譯：你好）為車牌，她說：「觀眾好鍾意我『李笑好』個角色，Bonjour係法文你好嘅意思，加上我喺加拿大滿地可長大，嗰度大家都講法文，如果我用呢個做車牌，其他車主見到我同佢哋打招呼嘅車牌，希望大家喺路上都互相禮讓，交通意外都少啲啦！」
攝影：葉君海 髮型：PatrickSo@Hair
服裝：Kookai
