大慶石化（362）嚟緊日子，增長應該好爆炸，係時候埋位。大慶本業之一，係產銷防腐塗料（輸油管重要原料之一），而俄羅斯總統普京上個月訪華，證實會建立中俄輸油管道（泰納線），兼喺08年底前向祖國輸油。呢條泰納線終點站就正正喺大慶市，集團嘅防腐塗料業務，食正天時地利，嚟緊兩年，隨時有爆炸性增長。
又大慶早喺04年，已經投入煤相關化工業（醋酸乙烯），呢瓣業務兼喺06年度中期（12月止），為大慶貢獻2800萬銀溢利，成為主打溢利來源。要咁睇，呢期唔少細細隻公司一話搞煤相關業務即刻炒到飛起，大慶雖則唔係直指上游礦產，但掹車邊，都有concept。以大慶上升旗形升幅目標價0.69元計，潛在回報率25%，到時，06年度預期PE不過14倍，並唔離譜，加埋有睇得見嘅前景，抵博。
四通折讓大得離譜
四通控股（409）最新NAV1.37元，現價（0.55元）相對折讓近60%，傳統紅色股當中，四通資產折讓大得離譜。又四通揸住約4.7%嘅新浪網，今年1月見底以嚟，升咗超過33%，新浪網呢鋪若然重展升浪，四通副家底，又水漲船高。
上星期五，孖寶之一嘅方正（418）彈升9%，四通只係升得1%，有得炒落後。博NAV折讓收窄到50%，都見0.68元，潛在回報率20%過外。
錢雋