近期PAAG隆胸出事嘅新聞成為全城熱話，而娛樂圈真係肯認隆胸嘅又有幾多人吖！關仁咁耐都只係見過樂基兒咁夠膽，直認隆胸之餘，轉個頭又玩縮胸！不過凡事都有例外嘅，曾以新人姿態，一出道就做咗成龍電影《霹靂火》女主角嘅胡凱欣，上個月就喺台灣坦承離婚後，為咗增強自信而接受隆胸手術。
轉戰海灘
胡凱欣隆胸後，梗係要即刻晒料啦，佢早前就去咗泰國度假，咁啱撞正潑水節，咁就梗係換晒新買嘅泳衣加入潑水行列啦，結果就成為箭靶，不停俾水潑，佢覺得好奇怪，問番啲朋友先知，泰國人見佢着成咁以為佢係人妖，而人妖被水潑到露點後會好開心，所以就唔停咁搵水潑佢，真係滑稽。
胡凱欣知道之後梗係唔開心啦，仲即時拉埋班friend走人，轉而去海灘玩。佢話隆胸之後確實增強咗自信，仲話喺酒店有一個老外住客，想搵佢做女朋友㖭，不過就當場拒絕咗！
