本報日前訪問了多名藝人，對於自訂車牌組合計劃，他們異口同聲表示有興趣。
薛家燕 心水車牌 NANCY8
「Nancy係我個英文名，而8諧音發，每個人嘅最大願望都係想發達，過好嘅生活，加上8呢個數目字好好意頭，所以我就將呢兩個字組合埋一齊，咁就好有意思啦！」
陳淑蘭 心水車牌 LCC168
「相士曾經同我講過，話168呢三個數字好利我，不但取其諧音一路發，仲會旺我嘅事業同愛情，所以我打算自訂車牌LCC168。而LCC就係蘭子嘅英文縮寫。」
吳雨霏 心水車牌 C00KLESK
「我加入娛樂圈初期係Cookies成員之一，自己英文名係Kary，所以我相信C00KLESK最能代表我，但因為O同I字都唔用得，惟有用其他字代替。」
鄧麗欣 心水車牌 1AMB00
「我自從睇過電影《怪獸公司》後，就好鍾意戲入面個BB，佢個名叫Boo，我已經將自己個網名改咗呢個名，所以自訂車牌梗係用1AMB00啦，一定唔會同人撞。」
譚小環 心水車牌 HAL1NAT
「我英文名係HalinaTam，不過因為自訂車牌只可用八個字，所以我只好選用HAL1NAT。T代表我個姓，好彩個英文名唔常見，用嚟自訂車牌都唔會好多人爭！」
陳霽平 心水車牌 R1A
「我雖然叫Maria，不過啲朋友鍾意暱稱我做Ria，所以我好想自訂車牌R1A，我覺得咁樣好有親切感，真係好似完全屬於我嘅嘢，大家一睇到呢個車牌就會諗起我！」
向海嵐 心水車牌 ARASH1
「Arashi係日文，中譯係嵐字，即係我個名。以前我喺加拿大已經用ARASHI呢個車牌，我到𠵱家仲一直畀牌費保留住。香港自訂車牌唔可以用I字，所以我就會用1字取替。」
曹永廉 心水車牌 TVB282
「公司一向對我好好，又會畀每個藝員一個儲物箱，我個儲物箱冧把係282，如果我用TVB282做車牌，觀眾同影迷見到，又想寄信畀我，咪可以提醒大家寄去呢度囉！」
