上星期日講開，請讀者對「狼過華秀隻狗」呢句俗語嘅起源提供意見，可能大家都對呢句話知其然，不知其所以然（包括左丁山在內），只收到一位讀者回應。一位李先生來電郵云：
「『華秀』，其實是一隻格力賽狗的狗名。澳門逸園賽狗場在開業初期，大約是四十多年前，有一隻質素超群的賽狗，名曰『華秀』，此狗每次出賽，大多勝出，其性格非常好鬥，每每會襲擊其他出賽的狗。故人皆說其『狼』，若有某人為人做事時很『狼』的話，便會被他人以『狼過華秀隻狗』來形容。此語其實沒有多久遠的社會背景，只不過是四十多年前的香港及澳門逸事。」
呢位讀者嘅講法幾新鮮，左丁山未聽過，姑且轉錄，畀其他讀者參考，歡迎繼續提供其他講法。
澳門賽狗熾熱之時，左丁山未有資格賭狗，聽先父講過有一隻狗王叫做「神行太保」，狗如其名，逢跑必勝，搞到要讓賽，讓其他格力狗五至十碼，一樣照贏，輸到啲外圍佬媽媽聲，因為香港人賭狗，幾乎個個幫襯橫街窄巷之外圍檔口也。呢隻「神行太保」後來在狗房暴斃，盛傳係畀人下毒毒死咗。但「神行太保」死咗，影響咗好多人冇興趣賭狗，廉署成立後大力整頓貪污警察，街邊外圍檔全部消失，於是澳門狗場興旺不再，到咗𠵱家，幾乎唔記得澳門重有賽狗呢回事。當年有隻賽狗叫做「華秀」嘅話，相信狗主取名必有出處，例如「爪皇飛電」係曹操隻馬，故此馬主周南（已故）引用，幾匹馬如「暗飛聲」、「碧紗籠」、「荊山玉」等等，名字皆有出處（唐詩），所以格力狗取名為「華秀」應有所本，不過左丁山才疏學淺，唔識得啫。
一位「讀者誠」來電郵講馬，認為馬會假如回贈一成畀大注碼投注人，不會刺激賭風，但佢建議如果馬會將獨贏派彩，提供一成優惠，更加好，例如「精英大師」勝出，獨贏派彩14元，馬會加多10%，共派15.4元，應該可以打擊到外圍。不過呢個方法似乎要好多錢，馬會唔知計唔計得掂條數呢？