「近期我就鍾意着啲歐洲牌子，不過因為冇假期，所以就唔可以親自去入貨，但係我就會上網睇歐洲嗰邊有乜新貨，好多時我仲會上網訂等佢寄嚟，雖然等嘅時間會耐咗少少，但亦都可以乘機發掘吓啲新牌子。」
葉翠翠筒鞋魅力
「全身我最鍾意係對鞋，我一見到就好鍾意，去到間舖頭都唔係即時有貨，好多時我哋買嘢，都唔可以咁common，所以呢對鞋我就襯件清啲嘅tee，同黑色牛仔褲，咁樣可以更加突出我對鞋。本身我就好鍾意買鞋，屋企有好多對，對對都好新，因為我不時會拎出嚟擦吓同睇吓！」
周麗淇斬件花裙
「呢套花裙嘅顏色畀人感覺好開心、好春夏嘅感覺，就咁睇落會以為呢條係onepiece裙，不過其實係twopiece嚟嘅，onepiece嘅服裝通常會蝦人着啲，如果有腰長、腰短嘅話會好易暴露出嚟，twopiece嘅服裝就會顯得身材比例靚啲。至於配件方面，耳環同頸鏈，我通常只會揀一樣嚟戴，因為戴得太多會畀人累贅嘅感覺。」
陳苑淇個性熱褲
「夏天嚟到，個個女仔都鬥快着背心短裙，但淨係露肉又太過刻意，欠缺風格，性感之餘都要有適合嘅配襯，我着緊嘅牛仔短褲啱晒𠵱家着，因為天氣未係太熱，而且我覺得着短裙冇乜安全感，着短褲跳舞都唔使就住，又唔使成日擔心走光。如果擔心自己雙腳太過肥、太過粗，可以配襯長靴，多少都可以遮到小腿，睇落去雙腳好似拉長咗咁。」
採訪：駱華齡、楊潔雯、卓美娟、張俊銘 攝影：葉君海、陳俊強
