影星藍娣胞姊、與劉韻合唱《偷偷摸摸》而名噪一時的五十年代歌星張萊萊，原來是晚清重臣張之洞的曾孫女，可惜顯赫家世未能為兩姊妹帶來幸福童年。雙親早逝，兩人小小年紀已登台謀生。藍娣與前夫曾江一段四角戀亦教兩姊妹神傷。當年曾江為與鄧拱璧一起而拋離藍娣，與鄧拱璧分開後，藍娣一心等待好友焦姣為自己與曾江再繫紅線，怎料焦姣竟與曾江成一對，令藍娣大受打擊。 撰文：戴彩煥
張萊萊，五十年代歌影兩棲藝人，是影星藍娣（張萊娣）的胞姊。四歲便開始跟隨父親開辦的馬戲團到東南亞演出，後來當上歌星，五八年憑與劉韻合唱《偷偷摸摸》聲名鵲起，後來還拍過電影及在邵氏擔任歌舞老師，甚至跑去耶加達做電影發行，一生充滿傳奇色彩，不過最精采的還要數她的顯赫家勢。
北京家祭失祖墳
一向對家族背景懞然不知的張萊萊，原來是晚清光緒年間重臣、洋務運動舵手張之洞的曾孫女。張萊萊說：「打仗嗰陣，同啲親友冇晒聯絡，爸爸媽媽又好早唔喺度，只記得細個嗰陣老一輩嘅人講過，我哋唔係平常人家，係官家子弟，所以要規規矩矩。九二年我移民澳洲之後，有個表姐同堂姊妹先後飛嚟搵我，講番家族嘅事，我先知張之洞原來係我曾祖父。」
張萊萊續說：「○○年嗰陣，我哋家族百幾人約埋一齊返北京祭祖，點知去到唔見咗個墳，唔知係咪後來俾人起咗，惟有喺公園露天地方拜祭，聊表心意。」
藍娣做手術失救
張萊萊有八兄弟姊妹，六妹張萊娣入行後改了個藝名藍娣，可惜九二年一個失敗的手術，奪去了藍娣的性命。張萊萊說：「妹妹好貪靚，佢兩隻腳趾公附近有嚿骨凸咗出嚟，聽人講做手術去割骨，結果手術失敗死咗！」
談到當年藍娣與曾江一段婚姻，張萊萊更是感慨：「妹妹好愛曾江，曾江同佢離婚，同鄧拱璧一齊，妹妹好傷心；直至曾江同鄧拱璧分手，妹妹仲一直等緊佢。當年焦姣（曾江現任妻子）係妹妹嘅最好朋友，佢知道妹妹嘅心意，話幫妹妹同曾江講，點知最後佢竟然同咗曾江一齊！」張萊萊不諱言曾因此事恨透焦姣，但那份怨恨早隨着藍娣離世而煙消雲散。
肥姐登門碰運氣
入行多年，張萊萊相識遍天下，連肥姐沈殿霞也曾是其家中常客，張萊萊說：「當年有好多導演、監製嚟我屋企傾偈，嗰陣阿肥（沈殿霞）仲係新人，冇乜嘢做咪日日嚟我屋企玩，順便碰吓運氣囉！最記得佢當年好鍾意一早嚟我屋企，食完早餐之後就喺度織冷衫，織到食完晚飯就返屋企喇！」
部份圖片提供：張萊萊
