昨日寫過周松崗年薪九百九十萬，比起霍建寧一億三千萬，屬於「廉價勞工」，點知引起好大反響，鬼咁多人打電話嚟投訴，話唔可以咁比較。八方真係唔明點解唔可以比較，地鐵同和黃都係上市公司，唔係公營機構噃。
實收997.5萬
不過，回響點大都大唔過任志剛。話說昨日金管局出年報，任總大幅加人工，八方成晚收電話，啲尊貴議員媽媽聲，話任總又要權又要錢，如果喺私人機構，以老任去年嘅表現（外滙基金嘅投資回報得三厘一，仲衰過存定期），一早炒咗魷魚。如果老任當自己係官，就冇理由攞咁高人工，仲高過佢上司唐唐同煲呔。
咁究竟有幾高？嗱，有數計嘅。二○○四年，任總嘅固定薪酬係649.3萬，浮動薪酬191.8萬，其他福利就48.8萬。到咗○五年，呢三樣報酬分別增至672.4萬、255萬同70.1萬。簡單啲講，佢前年一年收889.9萬，去年就收997.5萬，升幅係12.09%，真係恨死唔少打工仔。
唔怪之得任總前日喺佢自己個專欄度猛話外滙基金唔係自動波，要好多人做嘢云云；原來係打定底，等大家知佢有做嘢，並非白支人工。不過，○四年外滙基金嘅投資成績係5.7%回報，去年得3.1%，少咗好多噃，交盤咁嘅數出嚟，唔炒魷都要扣人工啦，仲有人工加？
傳真︰2623-9278
電郵︰[email protected]