章子怡前日身穿深色Armani外套及架上茶色太陽眼鏡，現身美國白宮舉行的胡錦濤歡迎會，時裝設計師鄧達智和形象設計師張學潤（Nelson）同聲批評其打扮，鄧達智昨日在電話中說：「佢嘅打扮好老氣，無論服裝、太陽眼鏡同髮型都好唔應該出現喺佢呢個年齡身上。」
「絲巾似箸菜」
鄧達智先批評章子怡的髮型說：「佢應該梳高佢，咁樣有味道啲，但可能佢覺得咁樣散發成熟韻味。」至於服裝配搭，鄧達智說：「歡迎會喺日頭進行，加上場地喺美國，佢着到黑麻麻，仲戴埋個茶色太陽鏡，同佢年紀好唔配，無可厚非佢咁嘅打扮好正統，但佢可以揀杏色、米色、藍色又或花啲嘅外套，更加啱佢身份。」
而Nelson亦對章子怡有彈冇讚，他在電話中說：「佢咁着好娘、好土，成個冇厘品味嘅阿太咁，一啲都冇氣質同貴氣，着壞晒件Armani。戴住嘅絲巾成箸菜咁，髮型又凌亂，冇彈性，搞到佢變成頭尖額窄，成個師奶咁款，好彩戴番副太陽鏡，人哋先估到佢係明星。」
採訪：比華利