壓力大，最佳減壓方法是走到大自然。「我認為最簡單的解惱方法就是去看星。你一個人站在沙灘上、望着星空『嘩！嘩！』地叫會像個儍瓜，但不要緊，因為，面對着偉大的星空而讚歎，就算儍，也儍得有品味」李天命說的。
朋友相約4月去台東睇鯨魚，與海豚共舞。正！但我5月至「放監」。行唔開，惟有放工去花墟魚街補數。壓力愈大，愈要減壓，竇唯日日踢波行花墟，睇佢光頭就知佢壓力大。養魚種花讓人了解萬物造化，是成人樂趣，亦啱一家大細，你睇海洋公園水母館幾迫人，只有小朋友先會揀米老鼠。
成人玩意可以好敗家，種花養魚亦然，但好難敗得過每月奉獻八千大元畀猿人的「潮童」。阿媽話：自己搵錢自己使，再敗家都敗自己家，咪學人攞30萬公數養錦鯉。我話：要敗就要敗得有品味，水族人崇拜日本水族名牌ADA（AquaDesignAmano），叫得Design真係唔只養魚，教主天野尚，玩水草Layout玩到出神入化，其產品設計簡約有型。Set一個靚缸喺屋企，有型兼襯得起你張EamesLoungeChair。
潮流雜誌吹捧設計師上神枱，唔少當年反叛（塗鴉）街童，如今變成滿肚腸肥的生意佬，仲以潮流教主自居，嘔！當乜鬼阿叔着一身街牌出來都可以開「潮流講座」，計我話，天野出來教吓你Set缸，順道賣吓自己品牌，均真好多！
