點樣先可以培養學生閱讀習慣，難倒唔少家長同老師。噚日出席推廣閱讀活動「悅讀交享樂」嘅教統局常秘羅范椒芬，就傳授四招畀台下幾百名學生，叫佢哋除咗要定下睇書目標、搵人一齊睇書同經常到書局或圖書館外，仲叫佢哋最好連喺廁所都擺啲書，咁去廁所時隨手都可以拎到書睇，聞聞書香。
噚日出席同一場合嘅，仲有立法會主席范徐麗泰，佢同學生分享時，解釋點解咁「親中」，原來係因為細路女時，佢有次去超市買雪條，排隊畀錢到佢哋，個收銀竟然媚外，當佢冇到，主動服務范太後面嘅西人先，搞到少年范太好嬲，即刻放番低支雪條，實行罷買，認真有骨氣！之後佢立誓要做個出色中國人。八方在此一提，范太細個時係搭纜車返屋企㗎。
講起羅太同范太，八方唔止一次聽到有人向住羅太叫佢范太，好彩噚日冇人犯呢個錯，否則都唔知叫佢哋邊個應咯！
傳真︰2623-9278
電郵︰[email protected]