80字頭出生的一代消費主義厲害，大家都見識到了吧？這班「細路」出世的整整十年，香港經濟經已起飛，簡直可以說是暴發到日日魚翅撈飯，造就他們成長期經已充滿物質享受，追求表面美好的事物。至於他們崇拜偶像的心態呢？係咪亦只看表面，夠型夠靚就等於一切？
記者：吳小明
攝影：周旭文、資料圖片
星級講場：90無偶像
問一班青春新人歌手，佢哋嘅偶像，清一色都是歌星影視藝人，位位天王天后級人馬。好易理解嘅，做新人梗係有奮鬥目標㗎啦，所以答案點會唔係同行中的頂尖分子先?!
Oscar愛倫伯
出道無耐的Oscar蕭潤邦，鍾意的偶像是哥哥Leslie同倫伯譚詠麟，佢話一定要將兩人並列一齊嚟講，因為二人代表的正是整個80年代的香港樂壇，缺一不可。Oscar話：「雖然自己81年出世，頭10年都仲係細路仔懵盛盛，但經歷咗青春期嘅90年代，返轉頭睇先至覺得哥哥同Alan係真正稱得上巨星，好多追隨佢哋嘅Fans經已由少女變師奶，但依然忠心擁護。相反90年代就如水過鴨背，有幾多粒星可以真係紅到10年以上？我真係唔覺！可能呢個年代嘅人無咁長情同念舊啩。唔單止偶像，我自己都鍾意細個嗰時多啲，好懷念細個喺慈雲山邨日日落街食油渣麵、買缽仔糕嘅時候呀。」
鄭融愛鬼妹
讀國際學校的Stephanie，名副其實番書妹一名，喜愛的偶像同是西人ChristinaAguilera完全意料之內。反而殿堂級的娜姐Madonna榜上無名，鬼咩，成四張有多好難有代入感，要愛當然要個當頭起㗎啦。
郭芯其愛玉女
一臉清純的郭芯其，連喜歡的亦是形象正派的天后級人馬Kelly。郭芯其話自己由細聽陳慧琳大，覺得她工作態度專業，無緋聞無是非，奮鬥目標都係佢咁話。
512愛劉華
成個裏原宿日本妹咁樣嘅「512」吳日言，反而對日本偶像無乜感覺，由細到大最鍾意的偶像係劉華，因為細個睇佢演嘅電視劇睇到大，好似自己哥哥咁有親切感。到中學開始貪靚，就愛上形象百變嘅Sammi，希望有日可以學到佢咁有時尚觸覺、咁有型。
平民講場：冷門又如何
至於一般後生仔學生妹，甚至半個圈中人嘅Model，佢哋嘅答案雖然亦以歌星明星佔多數，但都有個別例外，答案算係多元化，冷門一點的睇法亦有。
金城武
模特兒Christy（80年）
「都成廿幾歲人，好崇拜嘅偶像無㗎嘞喎。人大咗心態成熟咗，仲點會迷偶像㗎；比較鍾意有金城武囉，都係因為佢靚仔有型，望多兩眼咁啫。對自己有幾大影響力？無乜，無睇佢嘅戲又唔使死嘅，邊有影響力呀。」
李小龍
學生Pakho（86年）
「一定係李小龍啦。佢既係武術家又係哲學家，將中國武術發揚光大，簡直係終生模仿學習嘅對象㖭啦；計我話最重要唔係要學到好似佢咁一副好身手，反而嗰種自強不息嘅精神先最值得我哋尊敬同學習。」
尚連奴
學生Yankee（86年）
「我鍾意嗰個好偏門㗎喎，尚連奴呀。就係一套《這個殺手不太冷》已經鍾意咗佢，好鬼死型。」
老竇
模特兒Cici（82年）
「偶像係我老竇。點解？擔起頭家又養到我咁大，足足廿幾年仲唔係一項成就？當然值得封佢做偶像。」
畢彼特
模特兒Tobee（87年）
「畢彼特囉，咁靚仔又有演技，簡直係完美。」
林一峰
記者Cano（82年）
「林一峰。我覺得佢可以做到自己喜歡嘅音樂，又可以喺主流樂壇搵到食，幾叻仔；同埋佢ComeOut咗自己係基嘅，呢份坦白同勇氣好值得欣賞。我連佢出嘅散文結集都買埋，佢嘅書講好多佢嘅作品嘅故事，啟發我要從多角度、立體啲去理解事情，都幾有得着。」
