靚同唔靚往往係見仁見智，男同女嘅角度唔同、年紀唔同環境唔同都會影響結果。唐朝興肥嘟嘟，𠵱家就鬥晒排骨。其實美與不美好多時都係來自別人眼光，例如𠵱家一個人話你太瘦，你會大大聲話「𠵱家興呀！」但當十個人話你嗰陣時你會話「係咩？」到有一百個講，你就會開始增肥。
想知點先叫做靚？打開日本潮流雜誌，個個女Model都係厚嘴唇、亂頭髮，擺出一副憂鬱嘅眼神，死老竇咁！陽光嘅面孔、燦爛嘅笑容欠奉，全日本嘅Styling都好似打咗懵仔針咁，眼神呆滯。曾經覺得呢啲Styling好有味道，影相時想刻意模仿過，但結果叫啲Model做呢啲表情仲難，模特兒眼神要落足戲，否則味道全消。那一刻就開始學懂欣賞這些日本作品。
今期6月號《Mini》有SINDEE照片夾送，外表睇落好靚，但實則廢廢地冇乜用，內裏夾位設計粗製濫造好似小學生手工咁。幸好文章內頁大數日本100件至Hit女仔Tee補數，一次過睇過百件Tee，實在賞心樂事。
