港股大漲小回，恒指微跌32點。前晚，聯交所以為港股市值上破10萬億，準備開香檳慶祝，點知差少少，未有慶祝。
開香檳遲早嘅事，聯交所諸公如果搞慶祝，最好咪大陣仗。唔係迷信，搞得太巴閉，話唔定個市嚟1次殺傷力唔輕嘅調整。以前台灣同埋唔記得乜地方股市，破乜乜關，大事慶祝，興高采烈，冇耐，股民飲完香檳飲苦酒。
長實C輪2130：長實（001）係第3大升幅恒指成份股，再升1.60元，收88.05元，結果長實C輪，隻隻彈起，先幾日沽貨嘅，當然又係彈起，揼心口嗰隻彈起。
睇數據做嘢，最睇得上眼嘅係2130，收39.5仙，升44%。6月中到期，溢價1%，槓桿率22.3倍（有效13.8倍），引伸波幅21.1%。長實下月9日除息1.58元，計埋除息因素，隻輪溢價約2.8%，唔算貴。不過，長實近日升得太快，5日內上咗5.25元。想炒C輪，諗吓正股會唔會有可能先有獲利回吐呢回事，因住貪勝不知輸。
新地C輪4499：新地（016）再升2.10元，最威水嘅新地C輪係9338，升102%。「渣」少少嘅都上升4成。如果仲係睇好新地，4499條件啱睇。隻輪7月下旬到期，輪價78仙，溢價2.1%，槓桿率11.6倍（有效9.1倍），引伸波幅20.3%。炒嘅理由，係跟紅頂白，博正股繼續去；唔炒嘅理由，係正股累升唔小，驚有回吐。結論係，唔貪心，就唔會輸（雖然冇得贏）。
章盛