上個月浦東展覽中心舉行Quiksilver上海大師賽，香港代表俊仔擊敗中國全國第一車霖與大熱選手Johnny，取得中國專業選手比賽冠軍。18歲的他玩板4年半，當初何解踩板？「好奇，拎塊板落公園問哥哥可唔可以教我踩板……之後就學識咗嘞。」一句道盡香港踩板文化，你要學，街上大把板友願意教，不用學費，你教我我教你，大家無師自通，直至近日有報道謂有機構搞踩板課程，板友竟然相當反感，勁鬧生意人把踩板商業化，俊仔直言：「個課程好廢，要學落美孚就得啦，使乜畀錢吖。」
記者：陸伊琳 攝影：何家良
開班辦踩板課程
閱報，得悉踩板都有正統課程，並謂參加課程會有機會代表國家出賽，「激溜會」一向舉辦開花式滾軸溜冰訓練班，近年也兼辦踩板班，負責人吳先生說：「其實踩板係一種運動，不過一路以嚟都無人舉辦有規模嘅訓練班，所以未得到廣泛發展。」課程分初中高級班，初班教安全守則、基本平衡步法、企板、上板技巧、前後溜及轉向動作，「好適合啲完全無踩板經驗、想學又唔知點學嘅朋友參加。」
導師方面，「激溜會」會物色板界高手到學校任教，RbkShoesskaterKit415就是其一，最近他到龍翔官立中學教踩板：「同學對踩板好有興趣，只係唔知有乜渠道可以學，某啲家長對踩板呢個運動都開始改觀。」目前有踩板課外活動的多是國際學校，很多板仔帶板回校經常受到警告，吳先生說：「就好似舞獅一樣，初初將踩板運動帶入校園好困難，不過當校方真正了解呢項運動後，多數都唔會抗拒。」（課程查詢及報名：香港激溜會www.xskate.com.hk）
聲討踩板商業化
對於霎時湧現的踩板課程，板仔並不太受落，理據是：「唔係因為板仔要排除異己，其實大家都好歡迎推廣踩板，只係覺得有啲唔在行嘅人喺度扮代表，將踩板商業化。」老實，十個板仔九個半自學，福仔一句到尾：「我無跟阿Sir無上乜嘢班，拎住塊板搭句嗲，大家就係朋友。」這就是踩板文化，小圈子活動？當然喇，板仔靠塊板識朋友，扮Cool扮型兼排外？我不覺，我三張幾嘢人一句想試學，板仔們即雞啄唔斷叫我試，還醒多個360KickFlip。他們不是街童，就像在板界很響朵的俊仔，更贏了中國全國第一車霖，不過他很謙：「佢哋失準啫。」沒錯，板界切忌囂張。
俊仔續說：「某啲『有心人』刻意將踩板規模化，個搞手根本就唔係踩板人，點夠專業？舉辦課程其實另有居心，將踩板變成一盤生意，根本個課程就無用，要學？去美孚SkatePark啦，大把人免費教你。」推廣踩板都有錯？當一面倒數臭課程之時，板仔Maze卻公道地指並非一無是處：「起碼將踩板帶到入學校層面，加上啲機構有組織力，好多商業活動或者表演都會搵佢哋接洽，可以將踩板大眾化。」
無師自通一個崩都唔使
後記：女人三十學踩板
一眾板友及Kit415問我：「想唔想試吓踩板，有飛起嘅感覺㗎？」好想，即試，大家熱心教導，一個借板一個護住我，果然過癮，危險？哪一種運動保證安全？
