金、銀價跌個四腳朝天，現貨盎斯金價攀升至645.85美元後，突急挫至最低見607.95美元，跌幅5.87%；白銀仲勁，狂飆升上14.74美元的23年高位後，「無厘頭」急劇滑落至11.92美元1盎斯，跌幅約19.13%。上落如此驚心動魄，讀者還可記得冠一多番苦口婆心說：（金或銀）只可儲、不可炒嗎？
金銀齊齊「插水」，是有心人英雄所見略同，覺得本欄昨日所提出的兩個足以戳破貴金屬飆升神話的理由──利率見頂意味通脹受控或經濟頂唔住，啱聽並可以借來震貨？後市點睇？話明魔鬼「揸莊」，趁低吸納啦！
返回較理性一面，照目前形勢來衡量，通脹這頭「狼」，表面看似甚馴良，但卻可能在蟄伏伺機撲噬，皆因「上帝」畀太多營養（資金氾濫）和空間（全球化）過佢，如果控制不宜，終有一日走得快過脫韁野馬，無奈「上帝」不食人間煙火，又怎知人間何世？
經濟有衰退之虞？
至於經濟頂唔住，亦非亂噏者。聯儲局過去20個月加息15次，雖說循序漸進，然則由於原材料和商品期貨（包括石油）之價格同時攀升，對企業影響之後遺症仍未盡浮現出來，人們只看到企業賺大錢，請問甚麼企業？不是過去一直坐大的金融便是能源，最多還計埋藥業（唔通唔准人病）甚至科技（難道可以不用電腦及有關工具），瞧瞧房地產及建築，以至零售行業及汽車能環節，可有盤滿缽滿？縱使孳息倒逆「謎團」已被解開，人們又是否可放下心頭大石？會議局剛公布3月份領先指標繼2月下降0.5%後再跌0.1%，如果下次又跌，會否重演2000年第4季連跌3個月後經濟便邁向衰退？
姑勿論如何，「屠夫」（雪茄伏）殺個血流成河，「神」（格老）功成身退，Ben哥，睇你成功成仁矣！
註：昨日欄中是指日本或遲點傳出來有（原意是未有），手民之誤，特此更正！
王冠一