海南島近年全面開發，憑藉佢哋嘅優美海灘同景致，兼夾四季長青嘅個賣點，就值得旅客流連忘返，唔係點會得到「東方夏威夷」美譽呢。
身在海南出席博鰲論壇嘅煲呔，應該都被海南島如畫景色吸引住，所以佢今日出席完論壇揭幕禮，兼發表完演說後，決定唔隨新聞處大隊返港，反而會同太太鮑笑薇留喺當地，乘機玩番兩日，度過一個甜蜜嘅二人世界周末，到後日先返香港。
查實今次煲呔都唔係第一次去海南，佢噚日計計手指，發現都嚟咗三次㗎喇，只係今次以工作身份抵埗啫。有曾慶紅副主席召見，獲得例牌式支持一番，煲呔心情好鬼靚，噚日仲罕有咁問記者：「熱唔熱呀？」簡直同老董名句「食咗飯未？」有異曲同工之妙，八方希望佢唔好似老董收場咁就得喇。
傳真︰2623-9278
電郵︰[email protected]