80's消費:8字頭消費觀 儲錢?咪玩啦!

80's消費:8字頭消費觀 儲錢?咪玩啦!

要形容80年代出生一代的消費觀,上一輩會說:「不經思考、見啱就買、緊追潮流」,講經濟能力他們不比70年代強,但使錢能力卻遠遠超過,阿媽自細教你嘅唔好先使未來錢,就彷彿預告了一切。問佢哋消費模式,近八成都沒有儲錢習慣,「玩咩!儲錢?」,而且唔覺得有問題。歌手鄧穎芝大概就係當中典型。

記者:許維雅 攝影:陳盛臣、周旭文
模特兒:Zukmi 鳴謝:[email protected]

鄧穎芝(85):「儲錢?過多幾年先!」

鄧穎芝係新一代典型購物狂,其購物意欲來自一鋪儲嘢癮同貪新忘舊嘅性格。死穴係HelloKitty、粉紅色、毛毛狀、同任何閃閃嘢。購物比率佔收入四成,鍾意買衫買鞋買化妝品。細細個佢已經集貼紙、閃卡,「我當年有儲Sammi嘅Yescard㖭!最瘋狂試過去歐洲旅行用咗8萬蚊,一萬蚊買咗件衫拍MV,間房已經爆到冇位行,瞓覺要跳上床,仲要得二呎瞓。」不過,瘋狂還瘋狂,鄧穎芝從來唔鍾意先使未來錢,六年班已經開始做暑期工賺錢買心頭好,賣過書、做過肯德基同Sales,總之為咗買嘢佢甘心畀心機賺錢。
雖然仍未有儲錢嘅習慣,但人大咗開始抑壓吓自己,盡量唔碌卡,「不過上次去旅行都係忍唔住碌咗。儲錢?會㗎,過幾年先,希望到24歲開始可以開始實行啦。」

■去歐洲旅行,夠膽死喺迪士尼買咗座閃燈堡壘返嚟,純粹因為見到嗰刻真係覺得好靚。

使費分布:30%畀屋企 40%購物 15%飲食 15%玩樂 0%儲蓄

■鄧穎芝買完又鍾意儲,同一大堆封塵儲物合照仲鬼咁開心。

■鄧穎芝房間自拍照,亂到真係嚇死人。

余文樂(81):九成收入畀屋企

由於工作太忙關係,平時余文樂收入大部份錢都會畀晒媽咪,負責幫佢交租交雜費。阿樂唯一娛樂就係打機,使費大部份都係買Game。至於一向給人感覺追潮流,買衫又買鞋嘅佢,反而唔係成日買,亦唔會特別追,不過平時會Keep住買雜誌留意潮流。唯一死穴就係去日本,可能啲衫啱買,最勁一次試過使咗六位數字。

使費分布:90%畀屋企 5%購物 0%飲食 5%玩樂 0%儲蓄

8字頭:我買故我在
Kim(84/Sales兼學生):年輕人個個都係咁

消費:有穩定收入但卡數亦不少。購物乜都啱,一星期落蘭桂坊、卡拉OK各使幾百。
死穴:鍾意牌子嘢,除咗Ape。「最貴係$4,800買Nokia筆形電話,後來賤價一千放走!」
自評:「絕無問題。年輕人全部都係咁!儲錢?咪玩啦!」

0%畀屋企 40%購物 20%飲食 40%玩樂 0%儲蓄

阿傑(83/學生):三分一畀屋企

消費:現在主要收入來源都來自Part-time,有錢都會畀三分一屋企,乖仔一名。會儲起10%。
死穴:冇乜。大部份錢都係買衫居多,見到靚就買,唔會特別追某些牌子。
自評:「絕無問題。」

30%畀屋企 20%購物 20%飲食 20%玩樂 10%儲蓄

阿康(85/學生):唔儲錢唔係問題

消費:收入來自教學生彈結他,有錢都會畀少少屋企,不過更多時係唔夠使問屋企攞。
死穴:買雜誌。香港雜誌同音樂雜誌,其他多數買衫,買過最貴一支結他要$4,500。
自評:「同女朋友出街都要錢!我覺得自己唔儲錢唔係問題!」

10%畀屋企 30%購物 25%飲食 35%玩樂 0%儲蓄 

肥寶(84/學生):敲詐屋企

消費:主要收入來自敲詐屋企,食飯可以求其,玩佔消費一半,每星期都會去唱K。
死穴:乜都買。鍾意儲玩具,扭蛋、Figure統統唔放過,衫褲亦啱,買過最貴係一隻$3,000嘅錶。
自評:「好滿意!」

0%畀屋企 40%購物 10%飲食 50%玩樂 0%儲蓄

Sandy(85/學生):繼續使屋企錢

消費:Part-time收入主要做街頭訪問,唔係日日有工開,財政上需要屋企幫助。
死穴:每次落尖沙嘴、旺角行街,鞋同袋都係死穴,試過買過最貴嘅一個袋用咗$4,000。
自評:「OK。但大個咗已唔會成日開口叫屋企畀錢買嘢。」

0%畀屋企 30%購物 30%飲食 25%玩樂 15%儲蓄

Toby(85/學生):旅行癮

消費:主要來自返馬會Part-time,冇畀錢屋企但有儲錢習慣。
死穴:大部份收入餵畀五臟腑,購買方面以買衫居多。有鋪去旅行癮,最捨得買嘅嘢就係機票,試過用$5,000買咗一張去英國嘅機票。
自評:「無問題。」

0%畀屋企 30%購物 30%飲食 20%玩樂 20%儲蓄

玩具店SupermanToys:雜誌興乜買乜

據店員阿偉觀察,80年代嘅一群消費力強,超合金、鐵甲萬能合、星矢、龍珠等都是心頭好。「好多人嚟得買嘢購物完全唔使諗,見到啱就買。印象最深刻有個20歲左右的後生仔攞出$7,500現金買咗隻BabyMilo,好多時都唔明佢哋啲錢喺邊度嚟!這個年紀顧客大概佔舖頭生意額3至4成,佢哋好多時都係追雜誌買,呢排雜誌介紹乜就買乜,大部份都係追潮流玩具!」

$7,500嘅BabyMilo

潮流舖紅鞋宜:30歲考慮仲多

「80年代群佔舖頭生意額六成,Tee同牛仔褲係佢哋嘅大熱選擇。」據店員阿May透露,每次見佢哋畀錢都面不改容。「試過有個後生仔一次過買咗一萬蚊嘢都當閒事。最好笑係後生仔通常畀錢超爽快,反而30歲左右嗰啲顧慮仲多。根本80年代嘅人捱得少,唔知搵錢辛苦,有時見佢哋班人買咗新衫鍾意喺西洋菜街ShowOff,一臉滿足咁喺度行街逛舖,好笑又得意。」

■T-shirt算係水貨店平價貨,但平平哋都要$680/件。

波鞋舖HeadCoach:傾家蕩產都要跟

大部份排隊買貨都係8字頭,部份鍾意藉此放貨賺錢,限量版波鞋係首選。據店長Dantley講80年代啲𡃁仔佔舖頭生意六成,「最印象深刻係有個𡃁仔用一萬蚊買咗全球得24對嘅特別版波鞋,佢哋大部份心態都係人有我有,傾家蕩產都要死跟潮流死跟明星入貨,比起70年代群玩波鞋玩得更瘋狂。」

■Jordan系列一向係80年代年輕人嘅Target,復刻11代Boxset賣$6,400一樣搶手。