金屬價格大起大落，搞到金屬股走勢似足過山車，真係少啲膽汁都頂唔順。好似靈寶黃金（3330）昨日一度急跌至6元，收6.90元，跌幅仍高達12.1％，紫金礦業（2899）亦跌11.22％，收4.35元，真係心血少啲都會暈低。
經紀陳話，大市升咗咁多，人人都估有機會調整，正如金屬價格升咗咁耐，出現調整亦好正常。
近排工業股好似乏善足陳，主要受油價同埋原料價格上升影響。但經紀黃話，其實唔係所有工業股都咁差，好似產銷電腦硬盤內精密金屬零件的IPE（929），剛公布全年業績，盈利增長21％，有6439萬元。隻股即刻以先舊後新配股，每股定價1.87元，配售1.2億股，集資2.24億元。
配股由基金接貨
經紀黃話，IPE配股主要由幾個傳統基金要晒，雖然配股後股價跌穿2元，但據講接貨嘅基金繼續在市場增持，待沽壓消化後，隨時會有驚喜。
IPE昨日冇起跌，收1.88元，剛好高過配股價1個位。
慕容小初