睇「蘋果批」孫柏文嘅文章，理論多多，批判力強，於是搵機會識吓佢；初次見面，嘩，乜係大肥仔兼如此年輕，講話時噴出連番術語，如果自己唔係半桶水經濟佬，都唔知佢講乜，正是長江後浪推前浪，一代新人勝舊人，孫柏文睇落都怕頂多係神童輝參與創辦《壹週刊》之時嘅年紀，呢類質新馬，潛力未露，積累出賽經驗之後，可能係另一匹「勝利飛駒」，壹集團又多一員猛將。
不過咁，孫柏文可能對馬圈認識冇左丁山咁多喎，佢一連兩日寫救救賽馬，獻議三招，講到「放寬」劣質馬匹退休規定，等馬場「充斥老弱殘兵的馬群，減低每一場賽馬可出賽馬匹的數目……」，係行唔通嘅。
賽馬資訊如炒金、炒油、炒樓資訊，永遠都係不對稱嘅（asymmetric），asymmetry嘅問題，只能減少，不會消除。正因為咁，左丁山同一啲鍾意賭馬但從不入馬場嘅學者講過，賭馬非常intellectual，需要好多時間嚟降低資訊不對稱呢個問題，反之賭波就容易得多，保頓對車路士，凡球迷都知道車路士贏面高啦。但十四隻馬同場跑，方駿輝隨時可以搵到六至八隻有機會，你話幾辛苦呢！解決問題唔係人為地讓劣馬留在馬場，等到強弱分明，因為香港行馬匹評分制，唔會出現下駟對上駟嘅場面，而係下駟對下駟，上駟對上駟，十四匹劣馬一齊跑，爆冷門機會重大大增加。
孫柏文忽略咗馬圈之中，馬主角色亦重要。馬主第一個考慮係transactioncost（交易費用），每個月用兩萬幾三萬銀養隻劣質馬，養嚟做乜？其實即使馬會唔將啲低分馬（孫柏文筆下之劣質馬）掃出馬場，馬主亦會冇心機，實行將隻馬退役，慳番啲養馬費，故此「一個充斥老弱殘兵的賽馬匹群」並不成立。講馬講到呢處為止，孫柏文老弟如果想入馬場考察，左丁山隨時願意帶佢入場。