日本人、美國人改裝就見得多，中東人又點玩呢？佢哋咪用銀彈政策，將架車拆散再改過，好似呢部新款本田雅廓咁，四隻門都拆咗，改成上開式。最離譜就係後座車門，名副其實係鷗翼向上開。
後座要做呢種完全上開式車門，好講求車頂嘅硬度，因為車頂要承受一對車門的重量，一個唔小心，開門時就會令車頂折斷，而且一旦翻車，乘客更無法打開車門逃走，所以大家千祈唔好學佢咁改裝。
車身方面，佢就用咗20吋電鍍軨、超矮懸掛，令離地距只有7cm，基本上只可響平滑嘅路面上行走，為咗更加突出，車門同車底仲裝埋閃燈。
上開式車門咁危險，點解法拉利Enzo同林寶堅尼都用呢？佢哋係迫不得已㗎。因為呢類跑車要用最輕嘅材料做車架，但為咗有堅固結構，就要將車廂兩邊地台捲成兩個筒形，加強剛性，但呢個設計就無法安裝正常車門，惟有用上開式車門，所以唔係貪靚仔㗎。以後大家見到呢類改裝上開式車門，就唔好話佢醒目又有型。
記者：伍旋卓
