復活節嗰幾日有幾十萬港人返內地，滙豐大班鄭海泉都係其中一位，不過佢唔係去度假消費，而係孖住滙豐中國業務總裁翁富澤，同埋世界自然基金會代表，齊齊飛去武漢洪湖。做乜？唔係聽洪湖水浪打浪，係去視察濕地啫。
話說滙豐用咗三千萬人仔，資助「還長江生命之網」項目，目標係五年內恢復二百平方公里濕地，家吓只係四年，就搞掂咗五百四十平方公里（成半個香港咁大），鄭大班咪開心到要親身到場睇吓囉。據八方所知，佢除咗喺洪湖投放魚苗同種水草，仲順便觀埋鳥，又見過荊州副市長程雪良，幾日行程相信打通咗唔少人脈。
傳真︰2623-9278
電郵︰[email protected]