喺𠵱家商廈當打嘅年頭，造價不斷攀升，特別係啲細單位，啱啱就有一宗嘞。
力寶2座23樓10室，面積約970呎，全海景，由貿易公司以920萬買入自用，呎價9485蚊，創05年以嚟新高。
中原香港商業部助理營業董事李百堅表示，因力寶千呎內嘅盤源甚少，交吉嘅更加罕有，所以個客嗱嗱聲就扑槌。原業主揸咗10個月，轉手賺105萬，單位升值近13%。
李百堅話商廈市道咁旺，估計到第三季，力寶嘅呎價已可以穿一萬蚊關口，真係勢如破竹。
另外，美聯香港商業部高級經理周永亨報料，力寶1座一個1480呎高層單位，都係以交吉方式出售，成交價1228萬，每呎8297蚊。買家係投資移民客，計劃長揸收租。佢補充，呢個單位市值呎租可以做到35蚊或以上，回報近5.1厘，喺今日嘅環境，已算吸引。商廈市道咁好，有貨喺手嘅業主，簡直變成皇帝女啦。