昨日金銀銅鐵股全面造好，尤其係半新股湖南有色（2626），勁升20.97％，收3.75元，成交金額高達13.93億元，拍得住大藍籌有餘，實在係瘋狂得交關。
另一隻半新股玖龍紙業（2689）亦唔弱，最高見過6.50元，收6.45元，升11.21％，成交股數都有5931萬股，金額3.73億元。
目標價7元
雖然好多芬佬都話睇好玖龍，但玖龍股價一直企在6元樓下徘徊，要直至昨日美林發表報告唱好，話目標價見7元，隻股先至好似開咗turbo咁急升。
經紀黃話，其實等玖龍開車都等咗好耐，早排隻股公布中期業績，盈利有5.6億元，已經符合招股書中全年盈利預測的10.5億元一半有多，如果下半年生意持續增長，盈利超過招股書預測一啲唔出奇。家陣大市旺成咁，玖龍急升過後，隨時又係唞一唞再炒過的格局。
慕容小初