有沒有想過在煩囂的旺角也會有涼浸浸的感覺？甫踏進新開三個星期的AquaCafe已覺一陣涼快，餐廳裝修到好似水世界，以海鮮為主的菜式廉價過人不特止，還有較廉價的潛水課程、潛水旅遊及水上活動！
記者：葉靜君
攝影：陳盛臣
Model：Bamby
廉價潛水學堂
「香港有很多潛水會都自成一派，我好想打破這個局面，希望做到愛潛水就愛這裏，像個大家庭似的，給發燒友一個吹吹水的好地方，亦希望推動潛水活動普及化。」老闆Whyman說。如果你想學潛水，又無乜彈藥的，可以來這裏一試，保證唔會hardsell喎！
7個老闆各自搞嘢
這間主題餐廳一共有七個老闆，有潛水教練、船艇教練、廚師、工程師等，分別緊守不同的崗位。搞手主腦潛水教練Whyman說：「初時無諗得咁投入，後來愈來愈多人說有興趣，咪一齊搞囉！我哋雖然搞手多，但我哋合作性好強！」嘩！7個老闆，聲勢果然不同凡響。
星級菜平民價
大廚是五星酒店過來的，食物，當然有水準！不過餐廳不只靠捧餐賺錢，租售潛水儀器、潛水課程及辦出海活動也夠為皮，所以星級食物也只是平民價格。菜式方面以意、法、日味較重，大多以海鮮為主，Whyman話菜式種類雖不算多，但質素參差的菜式仍會刪除，更會不斷加入新的菜式。
紅酒燴牛膝$98
取正宗意大利及澳洲牛膝，而非普通匈牙利及新西蘭牛膝，加入薏米同牛膝草燜，以紅酒、白蘭地煮，食落好有酒味同肉的鮮味。
海龍皇扁意粉$88
以龍蝦湯煮意粉，將半隻本地鮮龍蝦切肉，加入番茄汁、雜椒同車厘茄煮，蔬菜同海鮮的鮮味，一向都是互相配合，今次也不例外。
珍珠濃湯$45
平時好少聽到梭羅魚，但原來用來煲湯最鮮味，呢個蠔湯底是用梭羅魚熬成的，師傅話煲至奶白色相當考功夫，最少要兩小時！飲落真係幾鮮甜喎！
焦糖布甸$38
色澤金黃，焦糖燒得剛剛好，大廚Martin話外面的布甸奶油味好重，這裏的忌廉、呍呢拿支及蛋黃溝得剛好，趁未熱便拿出來，外面又甜又脆，內裏滑得來不膩，正！
食客有Say
AquaBar&Cafe（36934818）
地址：旺角花園街2-16號好景商業中心302室
營業時間：12:00nn-2:00am
