吳君如喺復活節假期生女，佢喺商台主持嘅節目《她他她打到嚟》停咗咪幾日，噚日凌晨佢親自主持番個節目，大講生女心情。節目開始時君如仲整蠱做怪，話自己放假去咗泰國，講講吓先和盤托出，又用「雞仔」嚟形容自己囡囡。
「我好鍾意出風頭」
聽君如聲如洪鐘，睇嚟復元得唔錯，講到生女後嘅感受，君如話：「𠵱家咪好開心囉，我所有低調嘅計劃實行咗，當然又冇騷擾到自己嘅情緒、我屋企人，好多謝大家關心同照顧。」
君如一直以嚟都將懷孕事件保密，佢解釋話：「因為我覺得好舒服，我𠵱家做咗普通人會行嗰條路，冇乜咁special啫，咁我覺得每一樣嘢都喺掌握之內。我個人好鍾意出風頭，但係唔使擺喺生仔度。」君如雖然猛話自己生女冇乜特別，咁又何必故作神秘，搞到懶有嘢咁？仲要特登喺節目度講成晚！
馮仁昭噚日問過商台對外事務部，原來君如個節目係直播嘅，但就唔喺商台裏面做，據知係田蕊妮、鄒凱光同監製帶埋戶外直播儀器去佢屋企做，因為君如已經口頭上同電台請咗一個月產假，而期間亦唔會搵人頂替佢嘅主持工作。