中大MBA課程40周年，搞咗個「傑出講者系列」講座，李國寶同鄭海泉先後出場，噚日壓軸就請到任志剛主講，結果有成二百幾人捧場，校長劉遵義都有到。
中大話，任總事前講明，講座係閉門形式，唔招待傳媒，冇講詞兼唔畀錄音，不過華華收到風，話任總會講點樣維繫香港嘅國際金融中心地位，即係佢最耍家，但係又冇乜新意嘅話題囉！
講座唔俾採訪，但任總都好識做，專登早啲到場兼自動放料，都算唔話得。佢話家吓QDII部份條文開咗綠燈，咁本地金融機構及銀行，尤其係已經「入咗去」內地有分行業務嘅，就要行快幾步，出多兩分力，兼加多兩錢肉緊爭生意。
除咗叫人「走入去」，任總話要積極接住「走出來」嘅資金，仲叫大家爭取做第一個通過審批嘅境外機構，至於做唔做得到就靠自己啦！佢話，國內資訊未算完全開放，到底有幾多「肥水」會流出來，真係冇得估，但一定要做好風險管理，唔係就好易叉錯腳。
咪睇少24基點
講完QDII再講息口，任總話「一日息口未回落，一日都唔可以話見頂」，叫大家要有心理準備，短期內息口唔會突然跌番落嚟，皆因通脹隱憂一日未除，息口都會繼續加；但升勢會放緩，事關「都加咗十幾次，冇理由一直係咁加落去。」
雖則唔係人人都有機會聽任總演講，但大家可以上金管局網頁睇佢個專欄《觀點》，噚日就講到《金管局的工作》，話舊年外滙基金回報，比基準投資組合高出24基點，唔好睇少呢筆錢，足夠應付成個局三年行政開支喎。
李華華