新地靜雞雞喺西貢深涌濕地起咗個高爾夫球場，搞到俾環保團體齊齊炮轟，先排仲俾城規會先發制人，將成個9洞高爾夫球場地皮全部劃晒做農業用途，淨係准用嚟耕田，成個高爾夫球場連度假別墅嘅發展大計幾乎玩完。新地梗係唔肯就此罷休，仲向政府提出咗一個反建議，要求將劃做農業用途嘅地皮，轉做康樂及旅遊用途，繼續做番高球場，反建議將會喺下個月中上城規會討論。
大家不禁會問，新地點解要去到深涌咁遠起高爾夫球場呢？蘭西聽講，新地銳意喺深涌發展，除咗環境幽美之外，仲因為嗰度同新地喺十四鄉嘅大型住宅項目只係一程船距離，新地一路諗住喺十四鄉項目內起個9洞高爾夫球場，等班波友打完9個洞，坐船去深涌再打9洞，所以深涌係十四鄉項目嘅延續，睇怕新地都唔會放棄發展，一直力爭到底。