百年老店利豐（494）噚日出年報，由於改咗例，所有公司都要列明董事賺幾多銀両，所以𠵱家唔使估到底大佬主席馮國經人工高啲，抑或係細佬董事總經理馮國綸人工高啲。
原來公司最高人工嗰個係細佬，舊年𢭃成1484.6萬大元，差唔多係大佬嘅40倍。
紅歌手李玟個未婚夫、利豐執行董事Bruce人工都唔少，有成907.8萬元，足足較04年加咗15%，同業績表現同步。加到成千萬年薪，唔知Bruce儲夠老婆本未呢？若果結咗婚，第時唔使用未婚夫嚟形容咁煩，一句紅歌手老公仔就搞掂啦！
講開利豐，華華諗起《百年利豐》一書內提到，細馮喺「九一一」事件中死過翻生。點死過翻生？佢原本買咗8點50分嘅機票──即係撞向世貿大廈嗰班！但當日佢唔知點解突然唔想搭嗰班機，叫秘書換咗佢，結果就逃過一劫喇！佢事後同人講，可能係前人積德喎。