恒指最多跌過77點，埋單接近全日高位，反升113點，當係即日完成調整，又再升過。滙控（005）、新地（016）同中海油（883），對恒指總共貢獻76點。
本周以來，3個交易日裏便，恒指累升515點，距萬七只有56點。大關在前，點都有多少心理影響，賭C輪驚住高處不勝寒，會有調整。賭P輪又驚個市太惡，稍作調整又再上過。短期入市做嘢，最好控制注碼，咪賭得太大。
建行C輪2293：建行（939）喺呢幾日嘅升浪中，冇份郁，成日喺3.40至3.45元之間上落。現價3.45元，較月初派成績表前3.675元跌0.225元。以過去兩個禮拜計，大大落後大市。買落後股，本來唔係炒嘢之道，但調轉頭睇，萬一個市調整，落後股因為冇升過，都唔會傷得點重。
收啲建行C輪，博正股跟番大隊上去。正路之選係2293，8月初夠鐘，輪價44.5仙，溢價3%，槓桿率7.8倍（有效5.9倍），引伸波幅32.2%。
和黃C輪3574：和黃（013）升0.65元。近排，和黃相對落後大市，可以搵啲C輪短炒，正路之選係3574，10月初夠鐘，輪價34仙，溢價5.3%，槓桿率21.9倍（有效10.6倍），引伸波幅19.8%。想搏殺啲，則揀2211。
章盛