平日工作忙碌已經夠累人，仲要日日對住個石屎森林，再不出走，我怕自己都變石屎！於是走嚟出名超「Hea」的澳洲，然後，意想不到我會遇上有100%出現率的海豚之旅，仲可以無懼快相抄牌喺沙漠上超速飛車。
記者、攝影：杜慧妍
部份相片提供：RayAlleyPhotographic@ImagineCruises
四驅最刺激驚到彈起
絕對無諗過位於史提芬斯港（PortStephens）附近竟然有個大沙漠！更加無諗過可以喺呢個有2500年歷史的超級巨型沙丘荒漠上飛馳呀！咁大個女都未試過揸車，莫講話綿羊仔牌，就連私家車牌都未考的我，第一次坐上咁重型的四驅越野車的時候，真係好緊張！不斷問教練我唔識揸車玩唔玩得、怕唔怕炒車㗎，佢就叫我唔使擔心，「即使唔識踩單車的人都一樣可以玩！操作非常簡單！」經過教練一大堆理論講解之後，我們一行十三人終於可以齊齊整整一個跟一個出發啦！教練再提醒我們一定要跟住佢條Track（軌道）行：「沙漠咁大又多變，如果唔跟住行的話好容易會迷路，或者同其他隊伍相撞。」搞到我鬼咁騰雞，戰戰兢兢，唔敢揸咁快，慢慢跟住隨隊教練的Track行。不到10分鐘，我已經熟習了。好想試吓「飛馳」的感受，於是不停畀油，愈開愈快。大家唔好以為柔弱女子都玩得嘅四驅車無乜料到，我只不過開到50咪，㗎車就已經開始飄啦。唔理得咁多，我要一償所願，做楊千女華：「讓我於荒野馳騁……」再滑過起伏不斷的沙丘，連人帶車拋離地，「嘩！」真係嚇到彈起！知死未，教練苦口婆心提醒我要記得落Break，唔係好易失控！兩個鐘頭大大話話飛咗二、三十公里，又上山又落山，啲沙仲要猛撲埋塊面，然後喺接近80度的斜坡衝落去，真係細膽啲都嚇儍！
SANDSAFARISACTIVEADVENTURETOURS
查詢：www.sandsafaris.com.au
收費：成人119澳元起。
海豚自投羅網同你sayhi
第一次到史提芬斯港睇海豚，唔知係咪為咗歡迎遠道而來的我，見我用埋長鏡都影唔到佢條尾，海豚就自動自覺游埋嚟，「蒲頭」俾我見一見！船長Frank話ShoalBay海域附近長期都有一百六十幾條瓶鼻海豚（BottlenoseDolphine）聚居，「呢度係佢哋嘅家，雖然有時候佢哋會去附近幾個海灣玩吓！不過總會有一部份留守大本營招呼你哋嘅。」導賞員Pierre和Ray都係攝影發燒友，Pierre最鍾意幫鯨魚拍video，而Ray就擅長捕捉牠們躍出水面嘅美姿。Pierre仲會教團友點樣睇海豚的動態，「要留意佢哋飄游嘅方向，一路望住水波嘅移動……」話口未完，「Thisway,they'recomingthisway!」的聲音此起彼落，Pierre立刻着我站到船頭去，果然海豚就衝着我而來了！興奮得大叫，牠們就在我腳下、在前方賣弄身手，一次跳躍還不夠，仲搵多個伴來表演「雙豚跳水」，快門聲就更響個不停。Pierre急不及待看看我的照片：「Yousee,you'vegotaprefectshot!」來自悉尼的Gary和太太已經是第三次來史提芬斯港度假！「每次我們都會出海看看海豚，吹吹海風。這個海灣確實是令人感到舒暢的地方！」義工Skya是保護海豚的支持者，除了在船上向參加者介紹海豚的特性之外，還會教遊人做個負責任的觀豚者：「我自細喺呢度長大，最鍾意出海。PortStephens嘅海特別藍、水特別清，一定要教遊人愛護咁靚嘅環境。」
ImagineCruises
查詢：www.imaginecruises.com.au
收費：成人$22澳元起。
準備出發
《維珍假期五天三晚史提芬斯港之旅》機票連酒店套票，乘坐維珍航空直飛悉尼，三晚住宿史提芬斯港ShoalBayResort&Spa連接送服務。成人$7,790起，有效期至2006年12月16日。另可參加自選活動，包括海上觀賞海豚之旅等，成人$690起。查詢：28708733（維珍假期）
鳴謝：澳洲新南威爾斯旅遊局、維珍航空、維珍假期、澳洲史提芬斯港旅遊局、PortStephensShoalBayResort&Spa、PortStephensCoaches、ImagineCruises、SandSafaris