噚日講咗香港總商會總裁翁以登要ByeBye，跟住總商會就正式宣布委任方志偉接棒。方志偉就係02年接替張敏儀（圖），出任香港駐東京經濟貿易首席代表嘅官員。早兩個月大家都知佢唔撈，之後就傳出佢接替翁以登，果然空穴來風。
方志偉做過駐紐約經濟貿易辦事處處長、經濟局副局長，99年由運輸科調任經濟局，幫政府制訂港口航運及物流政策的最高諮詢機構──香港港口及航運局做秘書，三年唔夠，又再放洋，02年４月被派去東京，由D3級政務官，升到當時屬D5或D6嘅位，照計前景唔錯，但都係撈唔長。
咁究竟係個位風水唔好（佢前任張敏儀係用退休名義劈炮），定係曾特首行嗰套強勢管治文化的反射，真係天曉得。華華只知政府呢排唔夠人用，之前先搵曹萬泰填咗駐北京個位，而㗎仔個邊，又再由女將即前保安局副秘書長祝彭婉儀去招呼。
總商會主席艾爾敦話，方志偉對外經驗廣博，擅長處理香港經貿及商界嘅事務，對政府運作又熟悉，好啱佢哋咁話。但由於要過半年冷河，8月下旬先上任，總商會總裁個位有成三個月冇人坐，呢段期間會由兩位副總裁頂住先。