劉浩龍（師兄）小學六年級時體重已高達一百六十磅，最高峯更達二百磅。胖師兄除了在家被母親叫「肥婆龍」外，更慘遭親友取笑他胖得要戴胸圍。師兄慘遭連番取笑後，終於激發減肥決心，現時體重一百五十磅，弗到漏！
劉浩龍是家中的老大，比妹妹年長十一年，從小已肩負起照顧妹妹的重任，印象最深刻是見到初生妹妹的臍帶脫落，他說：「我湊BB都幾叻㗎，嗰時見到阿妹條臍帶甩咗，我都識得即時執起keep番佢，之後就由我負責湊住阿妹，所以佢大個咗之後都好黐我㗎。」
17歲體重高峯
雖然師兄十分痛錫妹妹，不過有時候也會作弄她，他笑說：「有次我同佢講，我用十個毫子換佢一張紙幣，之後佢仲同阿媽講，話哥哥對佢好好，因為佢覺得只係用一張紙就可以換咁多個銀仔，好着數呀！」
現時的師兄，身高五呎十吋，體重一百五十磅，身形標準，他小時候卻是肥仔一名，小學三年級體重已有一百三十磅，升上六年級時更高達一百六十磅，十七歲那年再攀升至二百磅，就連醫生亦擔心他的健康，建議他減肥。
「我唔想做湯圓」
師兄說：「有次屋企樓下個看更見到我，就話我咁肥，一定係女人湯圓，我聽完之後，一返到屋企就喊，仲同阿媽講話我唔想做湯圓，因為我唔想俾人食。」師兄笑言有些姨姨更取笑他胖得要戴胸圍，又叫他「肥龍」，就連劉媽媽都叫他做「肥婆龍」。師兄經過重重打擊後，終下定決心減肥，才修成今日的「正」果！
此外，師兄小時候已甚有科學頭腦，有一次他不小心用黑色水筆畫花了母親房間的牆紙，竟然心生一計，自製清潔劑希望能清除污迹，師兄說：「我嗰次將模型膠水混埋天拿水，一心諗住可以整甩撻迹，點知愈整愈大撻，最後因為驚阿媽鬧，所以匿埋喺廁所裏面唔敢出嚟呀！」
採訪：李珮洳
部份圖片提供：劉浩龍
